ირაკლი ღარიბაშვილი მიხეილ სააკაშვილთან დაკავშირებით სტრასბურგის სასამართლოს გადაწყვეტილებას არ აფასებს, პრემიერმინისტრი ამბობს, რომ ეს მისი პრეროგატივა არაა. მისივე თქმით, ამ საკითხთან დაკავშირებით ვრცელ განცხადებას იუსტიციის მინისტრი გააკეთებს.

"ჩვენ, ბუნებრივია, გავეცანით სტრასბურგის სასამართლო გადაწყვეტილებას. მე მინდა ვთქვა, რომ ბატონი იუსტიციის მინისტრი გააკეთებს ამ თემაზე ბრიფინგს უახლოეს რამდენიმე საათში და ვრცლად გააკეთებს განმარტებას. მე თავს შევიკავებდი, მე არ მსურს ამ თემაზე ვრცელი კომენტარი გავაკეთო, ეს არ არის ჩემი პრეროგატივა. იუსტიციის მინისტრი უახლოეს რამდენიმე საათში წარდგება საზოგადოების წინაშე და გააკეთებს ვრცელ განმარტებას", — განაცხადა პრემიერმინისტრმა.

ღარიბაშვილმა ასევე აღნიშნა, რომ ქვეყანაში ბევრი პრობლემაა და ის მხოლოდ ამ თემებზეა კონცენტრირებული, ამიტომ "პატიმარსა და პატიმრებზე" საუბარი დაასრულა.

"მე გითხარით, რომ პატიმარსა და პატიმრებზე მე საუბარი დავასრულე. ქვეყანაში არის უამრავი საკითხი, უამრავი პრობლემა და მე მხოლოდ ამ თემაზე მაქვს კონცენტრირება", — თქვა მან.

სტრასბურგის სასამართლომ საქართველოს ხელისუფლებას შიმშილობის შემდეგ მიხეილ სააკაშვილის შესაბამისი მკურნალობა დაავალა. მათივე გადაწყვეტილებით, სახელმწიფომ, ციხეში და ზოგადად, სააკაშვილის უსაფრთხოება უნდა უზრუნველყოს. მათ მთავრობას სააკაშვილის ჯანმრთელობის ამჟამინდელი მდგომარეობის შესახებ ინფორმაციის მიწოდება სთხოვეს, სააკაშვილს კი შიმშილობის შეწყვეტისკენ მოუწოდეს.