ამერიკის შეერთებული შტატების ელჩი საქართველოში კელი დეგნანი საქართველოს მთავრობას მოუწოდებს ექსპრეზიდენტ მიხეილ სააკაშვილის სრულად აღჭურვილ სათანადო დაწესებულებაში საჭირო სამედიცინო დახმარების მიღება უზრუნველყონ. დეგნანი, ასევე, მიხეილ სააკაშვილს მოუწოდებს მისი ექიმების რეკომენდაციები მიღებისკენ მოუწოდებს. მან, ასევე, აღნიშნა, რომ აშშ ყოფილი პრეზიდენტის დაპატიმრებასა და მისი ჯანმრთელობის მდგომარეობას ყურადღებით აკვირდება.

"რა თქმა უნდა, ჩვენ გვაღელვებს მისი ჯანმრთელობის მდგომარეობა. როგორც სამედიცინო კონსილიუმმა შეაფასა, მას გადაუდებელი მკურნალობა დაუყოვნებლივ სჭირდება. ასევე, სახალხო დამცველმა განაცხადა, რომ იმ დაწესებულებაში, სადაც ის იმყოფება არ არის შესაბამისი და საკმარისი პირობები პირობები იმისთვის, რომ საჭირო სამედიცინო დახმარება გაეწიოს. ამიტომ ჩვენ მოვუწოდებთ მთავრობას მიხეილ სააკაშვილის საჭირო სამედიცინო დახმარების მიღება სრულად აღჭურვილ სათანადო დაწესებულებაში უზრუნველყონ. ასევე, მიხეილ სააკაშვილს მოვუწოდებთ, თავისი ექიმების რეკომენდაციები მიიღოს", — განაცხადა დეგნანმა.

ელჩის თქმით, მიხეილ სააკაშვილის სიტუაცია ძალიან სენსიტიური და ემოციურია და ამ შემთხვევაში პრიორიტეტია, რომ პაციენტის ფსიქოლოგიური და ფიზიკური ჯანმრთელობა დაცული იყოს.

"ჩვენი დაჟინებული მოწოდება საქართველოს მთავრობის მიმართ მისი სამედიცინო საჭიროებების დაკმაყოფილებაა. ასევე, მნიშვნელოვანია რომ მასე მოეპყრან სამართლიანად და ღირსებით საერთაშორისო სტანდარტებისა და საქართველოს კანონმდებლობის შესაბამისად, იმიტომ რომ ნებისმიერ ქვეყანაში ეს არის სახელწიფოს პასუხისმგებლობა და მოვალეობა, რომ იზრუნოს პატიმრების მდგომარეობასა და მათ დაცვაზე, მათდამი რაიმე სახის ზეწოლისა თუ ძალადობის აღმოსაფხვრელად", — განაცხადა მან.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ექსპრეზიდენტის ციხეში შეყვანის შემდეგ ადგილზე სპეცრაზმი, წყლის ჭავლის მანქანა და დამატებითი საპოლიციო ძალები შეიყვანეს. გარდა ამისა, ციხეში მიიტანეს კომპიუტერული ტომოგრაფიის აპარატი. მანამდე რამდენიმე დღით ადრე კი უწყება ამტკიცებდა, რომ ციხის კლინიკა საჭირო ტექნიკით აღჭურვილია.

მოთხოვნის მიუხედავად, სააკაშვილთან ღამით არ უშვებდნენ არც ადვოკატებს და არც პირად ექიმს. ადვოკატების თქმით, არასამუშაო საათების მიუხედავად, ვითარება ორდინალური არ იყო და უნდა შეეშვათ.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

გარდა ამისა, ციხიდან გამოსვლის შემდეგ ომბუდსმენმა თქვა, რომ მე-18 პენიტენციურ დაწესებულებაში ჯერ კიდევ დერეფანში დგას კომპიუტერული ტომოგრაფი, რომელიც იქ მას შემდეგ მიიტანეს, რაც კლინიკაში მიხეილ სააკაშვილი გადაიყვანეს. მისივე თქმით, კლინიკაში არ არის მაგნიტურ რეზონანსული ტომოგრაფიისა (MRT) და კათეტერიზაციის აპარატი.

ფიზიკურ ძალადობაზე საუბრის გარდა, სააკაშვილი წერილში ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში".

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.