უწყებათაშორისმა საკოორდინაციო საბჭომ დღეს ახალი გადაწყვეტილებები გააჟღერა. რამდენიმეთვიანი განხილვის შემდეგ, საბჭო შეთანხმდა მწვანე პასპორტების ამოქმედებაზე. ასევე, ვაქცინაციის წასახალისებლად კამპანიის გაძლიერებასა და პენსიონერებისთვის დაანამატის გაცემაზე.

მწვანე პასპორტები

საკოორდინაციო საბჭოს გადაწყვეტილებით, პირველი დეკემბრიდან ე.წ. მწვანე პასპორტები ამოქმედდება. პრემიერმინისტრის განმარტებით, პირს მწვანე სტატუსი აქვს:

• თუ ის ვაქცინირებულია სრულად;
• ჩატარებული აქვს 72-საათიანი ვალიდურობის PCR ტესტი;
• ჩატარებული აქვს 24-საათიანი ვალიდურობის ანტიგენ ტესტი;
• გადატანილი აქვს კორონავირუსი.

"ასევე, იყო მოსაზრება, რომ კოვიდგადატანილებზე ყოფილიყო 6-თვიანი შეზღუდვა, მაგრამ ჩემი რეკომენდაცია იყო, რომ ეს შეზღუდვა მოგვეხსნა და საბჭომ გაიზიარა ჩემი წინადადება. ამიტომ მწვანე სტატუსი ექნება პირს, ვისაც გადატანილი აქვს კორონავირუსი", — განაცხადა მან.

მწვანე პასპორტის მოთხოვნა იმოქმედებს 18 წლის ასაკის ზემოთ მოქალაქეებისა და ტურისტებისთვის. პირველი დეკემბრიდან ისინი სხვადასხვა ობიექტზე მხოლოდ მწვანე პასპორტებით შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.

ეს დაწესებულებებია:

• კვების ობიექტები — რესტორნების, კაფეების და ბარების ღია და დახურული სივრცეები;
• კინოთეატრები, თეატრები, ოპერა და მუზეუმები;
• საკონცერტო დარბაზები;
• გასართობი ცენტრები;
• სამორინეები და სათამაშო ბიზნესის ობიექტები;
• სპა-ცენტრები და ფიტნეს-დარბაზები;
• სასტუმროები;
• სამთო კურორტების საბაგირო გზები.

საბავშვო-გასართობ ცენტრებში მწვანე პასპორტის მოთხოვნა იმოქმედებს მხოლოდ 18 წლის ასაკს ზემოთ მოქალაქეებისთვის.

"საზოგდოებრივ ტრანსპორტში, მაღაზიებში და ისეთ სერვისებში, რაც არის აუცილებელი, ბაზისური სასიცოცხლო მოთხოვნა — ადამიანი უბრალოდ საყოფაცხოვრებო საქმიანობას და ყოველდღიურ ცხოვრებას ვერ გააგრძელებს იმის გარეშე, თუ არ შეიძინა პროდუქტი — ასეთ ადგილებში მწვანე საშვის პასპორტი ჯერჯერობით არ ამოქმედდება" — განმარტა გაბუნიამ.

ვაქცინაციის წამახალისებელი კამპანია

ღარიბაშვილის განცხადებით, იმუნიზაციის კამპანია კიდევ უფრო აქტიური გახდება და ქვეყნის მასშტაბით, ყველა მუნიციპალიტეტში გაიმართება სააგიტაციო კამპანია. აქვე პრემიერმინისტრმა ხაზი გაუსვა, რომ ვაქცინაცია სავალდებულო არ გახდება.

"ჩვენ ვაქცინაციას სავალდებულოს არ გავხდით. არ არის ვაქცინაცია სავალდებულო და არ გახდება სავალდებულო ჩვენს ქვეყანაში. ეს არის ჩვენი მტკიცე გადაწყვეტილება და ამ გადაწყვეტილებას მე არ შევცვლი. რა თქმა უნდა, ჩვენ მოქალაქეებს უნდა ავუხსნათ, დავეხმაროთ, განვუმარტოთ რომ ვაქცინაციაა არის გამოსავალი და აცრა გვიცავს სიკვდილისგან", — განაცხადა ღარიბაშვილმა.

საპენსიო დანამატი

დღეიდან, 8 ნოემბრიდან თითოეული პენსიონერი, რომელიც ვაქცინაციას პირველ იანვრამდე ჩაიტარებს, ერთჯერად 200-ლარიან საპენსიო დანამატს მიიღებს. დანამატი გაიცემა პირველი აცრის გაკეთების შემდეგ.