საკოორდინაციო საბჭოს გადაწყვეტილებით, პირველი დეკემბრიდან ე.წ. მწვანე პასპორტები ამოქმედდება. გადაწყვეტილება საკოორდინაციო საბჭოს სხდომის შემდეგ, პრემიერმინისტრმა, ირაკლი ღარიბაშვილმა გამოაცხადა.

"პირს მწვანე სტატუსი აქვს, თუ ის ვაქცინირებულია სრულად, ჩატარებული აქვს 72-საათიანი ვალიდურობის PCR ტესტი ან 24-საათიანი ვალიდურობის ანტიგენ ტესტი, ან გადატანილი აქვს კორონავირუსი. ასევე, იყო მოსაზრება, რომ კოვიდგადატანილებზე ყოფილიყო 6-თვიანი შეზღუდვა, მაგრამ ჩემი რეკომენდაცია იყო, რომ ეს მოგვეხსნა და საბჭომ გაიზიარა ჩემი წინადადება. ამიტომ მწვანე სტატუსი ექნება პირს, ვისაც გადატანილი აქვს კორონავირუსი", — განაცხადა მან.

პრემიერმინისტრის თქმით, დეკემბრიდან მოქალაქეები სხვადასხვა ობიექტზე მხოლოდ მწვანე პასპორტებით შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.

"ეს არის კვების ობიექტები, გასართობი ცენტრები, კინოთეატრი, ოპერა, მუზეუმები, საკონცერტო დარბაზები სამორინეები, სათამაშო ბიზნეს ობიექტები. ამის თაობაბაზე დეტალური ჩამონათვალი გავრცელდება", — განაცხადა მან.

რაც შეეხება იმას, თუ როგორ გადაამოწმებს მოქალაქე საკუთარ სტატუსს, როგორც უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ განაცხადა, უახლოეს მომავალში ამისთვის აპლიკაცია ჩაეშვება.

"ეს რეგულაცია გაფართოვდა, აქამდეც მოქმედებდა და ის მოქმედებდა სპეციალური ვებგვერდის საშუალებით — covidpass.moh.gov.ge. უახლოეს მომავალში ჩაეშვება სპეციალური აპლიკაცია, რომლის მეშვეობითაც თითოეულ ჩვენგანს შეგვეძლება, ჩვენი სტატუსი მუდმივად თან ვატაროთ სმარტფონების მეშვეობით. იქნება სპეციალური აპლიკაცია, რომელიც გადაამოწმებს ჩვენს სტატუსს.

აგრეთვე, სტატუსის გადამოწმება შესაძლებელი იქნება ნებისმიერი სმარტფონის ფოტო კამერის მეშვეობით. ასევე, დამატებითი კომუნიკაცია შედგება ბიზნესის სხვადასხვა სექტორის წარმომადგენლებთან და იქნება საშუალება, რომ ყველა დეტალი გავიაროთ ყველასთან", — განაცხადა მან.

გაიგეთ მეტი: