დაავადებათა კონტროლის ცენტრის დირექტორის, ამირან გამყრელიძის განცხადებით, ხვალ, 8 ნოემბერს საკოორდინაციო საბჭო მთელ რიგ გადაწყვეტილებებს მიიღებს, რაზეც უკვე კონსესუნსი არსებობს. მისი თქმით, ეს შეეხება ვაქცინაციის წამახალისებელი ღონისძიებებს 60 წელს გადაცილებულ მოქალაქეებში და მწვანე პასპორტს.

"ამ ღონისძიებებმა მაქსიმალურად, რაც საშუალება არის, უნდა გაზარდოს აცრის მოცვა ქვეყანაში, იმიტომ, რომ აცრის გარეშე ეს პანდემია არ დამთავრდება, გვექნება ახალი ტალღები და სამწუხაროდ, გვექნება დიდი ადამიანური დანაკარგი", — განუცხადა მან პირველ არხს.

ბოლო პერიოდში განსაკუთრებით გააქტიურდა საუბარი იმაზე, რომ ქვეყანამ მწვანე პასპორტის შემოღებაზე უნდა იფიქროს. ამ საკითხზე მსჯელობას საკოორდინაციო საბჭოში ადასტურებდნენ, თუმცა კონკრეტული გადაწყვეტილება ამ დრომდე არ არის მიღებული. ამასთან, 4 ნოემბერს ჯანდაცვის მინისტრის მოადგილემ, თამარ გაბუნიამ განმარტა, რომ მწვანე პასპორტი ვერცერთ შემთხვევაში ვერ ჩაანაცვლებს არსებულ რეგულაციებს.

დღეს, 5 ნოემბერს ამაზე ისაუბრა აშშ-ის ელჩმა საქართველოში, კელი დეგნანმა. მისი განცხადებით, მწვანე პასპორტი მნიშვნელოვან როლს თამაშობს პანდემიის პირობებში და ბევრ ქვეყანაში ის ადამიანებს ვაქცინაციის მნიშვნელობის გააზრებაში დაეხმარა. დეგნანმა აღნიშნა, რომ ეს ხელსაყრელია ეკონომიკის აღდგენისთვის. ელჩი იმედოვნებს, რომ ისევე, როგორც სხვა ქვეყნებში, ის საქართველოშიც ეფექტური იქნება.