მოძრაობა სირცხვილია დღეს, 31 ოქტომბერს, 19:00 საათზე პარლამენტთან დაგეგმილ ოპოზიციის აქციას უერთდება. მოძრაობაში მიიჩნევენ, რომ თავისუფალი არჩევნების შესაძლებლობა "ოლიგარქის ავტორიტარულმა რეჟიმმა საბოლოოდ მიისაკუთრა", შესაბამისად, არ აღიარებენ ხელისუფლების ლეგიტიმაციას და აცხადებენ, რომ დემოკრატიულ პროცესებთან დაბრუნების გზა მასობრივი მშვიდობიანი პროტესტია.

"ნიშანდობლივია, რომ მიუხედავად დაშინებისა და არნახული ტერორის, სიძულვილზე აგებული კამპანიის, ადამიანების მოსყიდვის, მუქარის, პროპაგანდის სრულად ამუშავების, დარღვევების, კარუსელების, ბიულეტენების ჩაყრის, ჟურნალისტებსა და დამკვირვებლებზე ფიზიკური და სიტყვიერი შეურაცხყოფისა და ერთი სიტყვით, სახის ბოლომდე სრულად დაკარგვის შემდეგ თავისივე დამორჩილებული ცესკოთიც კი, სხვაობა ოპოზიციონერ და სამთავრობო კანდიდატებს შორის მინიმალურია.

ხალხმა დააფიქსირა ნება, რომ აღარ გვსურს ერთპარტიულ, ავტორიტარულ რეჟიმში ცხოვრება. ახლა, ან დავიცავთ დემოკრატიას საქართველოში და დავიცავთ საკუთარ ხმას, ან ბოლომდე დავემონებით მას, ვისთვისაც ამ ქვეყანაში ყველა მისგან განსხვავებული სახელმწიფოს მტერია", — ვკითხულობთ აქციის ანონსში.

სირცხვილიაში აცხადებენ, რომ ეს ბრძოლა სახალხოა და არა პარტიული.

ნაციონალური მოძრაობის თავმჯდომარემ, ნიკა მელიამ განცხადა, ისინი აქციიაზე შემდგომ სამოქმედო გეგმას წარადგენენ. მისი თქმით, არავის უნდა ჰქონდეს ილუზია, რომ "მოპარული არჩევნები" რომელიმე ხელისუფალს შერჩება.

გაიგე მეტი: