ცესკოს თავმჯდომარის, გიორგი კალანდარიშვილის შეფასებით, არჩევნების მეორე ტური შედგა. ამის შესახებ მან ბრიფინგზე ისაუბრა, სადაც 30 ოქტომბრის ადგილობრივი თვითმმართველობის არჩევნები შეაჯამა და წინასწარი შედეგები გამოაცხადა.

"საარჩევნო პროცესი იყო საკმაოდ კონკურენტული, მიუხედავად ამისა იყო ხარვეზები, თუმცა საერთო ჯამში, არა მარტო ჩვენი შეფასებით, საუბნო საარჩევნო კომისიებში მისულ ამომრჩეველს დახვდა კოვიდუსაფრთხო და პროფესიულ დონეზე ორგანიზებული საარჩევნო გარემო. ხოლო ცალკეულ შემთხვევებში მცირედი ხნით შეფერხდა კენჭისყრის პროცესი კონკრეტული ინციდენტების გამო, რასაც მთლიან პროცესზე გავლენა არ ჰქონია. არჩევნების მეორე ტური შედგა", — თქვა მან.

რაც შეეხება საჩივრებს, კალანადრაიშვილი თქმით, ამ წუთისთვის მათ ხელთ არსებული ინფორმაციით, გუშინ სულ 272 საჩივარი შევიდა, აქედან 121 იყო დამკვირვებელი ორგანიზაციების მიერ წარდგენილი, ხოლო 151 — საარჩევნო სუბიექტების. ცესკოს თავმჯდომარის განცხადებით, მათი უმეტესობა შეეხებოდა პროცედურულ დარღვევებს, რის შესახებაც დეტალურ სტატისტიკას საჩივრებთან მიმართებაში ცესკო უახლოეს მომავალში წარმოადგენს.

მან ისაუბრა ბათილ ბიულეტენებზეც და აღნიშნა, რომ დეტალურად დღის განმავლობაში შეისწავლიან მას და შესაბამისი ანალიზის შემდეგ წარმოადგენენ მონაცემებს.

"არ ვფიქრობ, იქ ნამდვილად გადაჭარბებულ შემთხვევებთან გვაქვს საქმე, თუმცა დეტალურად ჩვენ გავეცნობით, ასევე, მოვახდენთ ანალიზს სხვა წლებთან მიმართებაში, პირველ ტურთან მიმართებაში და ამის შესახებ დაზუსტებულ ინფორმაციას შესაბამისი ანალიზის განხორცილებეის შემდეგ მოგახსენებთ", — აცხადებს ის.

ამ ეტაპზე წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

30 ოქტომბერს საქართველოში თვითმმართველობის არჩევნების მეორე ტური გაიმართა. გამოქვეყნდა ეგზიტპოლის ორი განსხვავებული შედეგი. მთავარი არხის ეგზიტპოლით, ოპოზიცია მეორე ტურში ყველა დიდ ქალაქში იგებს. რაც შეეხება ტელეკომპანია იმედის დაკვეთით ჩატარებულ ეგზიტპოლის შედეგების, ამ კვლევის მიხედვით 4 დიდ ქალაქში მმართველი გუნდის კანდიდატები იგებენ.

ნახეთ არჩევნების მეორე ტურის შედეგები დეტალურად On.ge-ზე: