ამერიკელი კონგრესმენი, ბრედ შერმანი ქართული ოცნების ხელისუფლებას მოუწოდებს, რომ ჯანმრთელობის მდგომარეობის გაუარესების გამო ექსპრეზიდენტი მიხეილ სააკაშვილი საავადმყოფოში დაუყოვნებლივ გადაიყვანონ. ამის შესახებ მან ოფიციალური განცხადება გაავრცელა.

"ღრმად შეშფოთებული ვარ საქართველოს ყოფილი პრეზიდენტისა და უკრაინის რეფორმების ეროვნული საბჭოს აღმასრულებელი კომიტეტის თავმჯდომარის, მიხეილ სააკაშვილის ჯანმრთელობის მდგომარეობის გაუარესებით, რაც საქართველოს ხელისუფლების მიერ, დაუსწრებლად წარდგენილი ბრალდებების გამო მის დაპატიმრებას მოჰყვა. ბრალდებების, რომელსაც აკრიტიკებენ, როგორც პოლიტიკურად მოტივირებულს.

ექსპრეზიდენტის პატიმრობის გაგრძელება საფრთხეს ქმნის იმისა, რომ საქართველოში პოლიტიკური ბზარები გაღრმავდება და გადაიდგმება ნაბიჯები, რომლებიც ძირს გამოუთხრის დემოკრატიას. რამდენადაც საქართველში პოლიტიკური კრიზისი გრძელდება, რომელმაც შეარყია საზოგადოების ნდობა ჯანსაღი დემოკრატიული პროცესებისადმი, ოპოზიციური ფიგურების, მიხეილ სააკაშვილისა და მანამდე ნიკა მელიას დაკავების ტენდენცია არაა ის გზა საქართველოსთვის, რითაც მნიშვნელოვანი დემოკრატიული და ევროატლანტიკური ტრაექტორია უნდა გააგრძელოს.

როგორც წარმომადგენელთა პალატის საგარეო ურთიერთობათა კომიტეტის უფროსი წევრი, მოვუწოდებ ქართული ოცნების მთავრობას, დაუყოვნებლივ მიიღონ გადაწყვეტილება სააკაშვილის გაუარესებულ ჯანმრთელობის მდგომარეობასთან დაკავშირებით და გადაიყვანონ საავადმყოფოში კრიტიკული მკურნალობისთვის. სააკაშვილისთვის შესაბამის სამედიცინო და იურიდიულ მომსახურებაზე შეუზღუდავი წვდომის გარანტია არსებითია ქართველი ხალხის ნდობის აღდგენისა და საქართველოს სწორ დემოკრატიულ გზაზე დასაბრუნებლად", — აცხადებს კონგრესმენი.

საქართველოს მესამე პრეზიდენტი, მიხეილ სააკაშვილი დაკავებიდან, 31-ე დღეა შიმშილობს. გუშინ სააკაშვილმა განაცხადა, რომ იგი უარს ამბობს შიმშილობის შემამსუბუქებელ მკურნალობაზე, რადგან მას არ სურს გლდანის ციხის საავადმყოფოში გადაყვანა. თუმცა ამის მიუხედავად, ხელისუფლება არ აპირებს ის სამოქალაქო კლინიკაში მოათავსოს და აცხადებს, რომ დაწესებულებაში ყველა პირობაა შექმნილი, რათა პატიმრებს შესაბამისი სამედიცინო დამხარება გაუწიონ. გარდა ამისა იუსტიციის მინისტრი, რატი ბრეგაძე ამტკიცებს, რომ სააკაშვილს მკურნალობაზე უარი არ უთქვამს იღებს ყველა იმ სითხეს, პრეპარატსა და აბს, რასაც იღებდა წინა დღეების განმავლობაში.

გაიგე მეტი:

• გვაქვს ასეთი ინფორმაცია, რომ ის მაინცდამაინც დღეს აპირებს გახდეს ცუდად — კობახიძე სააკაშვილზე
• საჭიროების შემთხვევაში, სააკაშვილს ვერტმფრენით გადავიყვანთ #18 დაწესებულებაში — ბრეგაძე
• სააკაშვილის ჯანმრთელობის გაუარესების შემთხვევაში გადაყვანისას ხელისშეშლა იგეგმებოდა — სუს