ქართული ოცნების თავმჯდომარის, ირაკლი კობახიძის განცხადებით, აქვთ ინფორმაცია, რომ ექსპრეზიდენტი მიხეილ სააკაშვილი აპირებს დღეს, კენჭისყრის დღეს გახდეს ცუდად, ანუ აპირებს სიმულირებას.

"რაც შეეხება სააკაშვილს და მის იმიტირებულ შიმშილობას, ჩვენ გვაქვს ასეთი ინფორმაცია, რომ ის მაინც და მაინც დღეს, კენჭისყრის დღეს აპირებს გახდეს ცუდად, ანუ აპირებს სიმულირებას იმისთვის, რომ ხალხში, თავის მხარდამჭერებში ემოციები აღძრას, თუმცა ესეც, რა თქმა უნდა, განწირულია წარუმატებლობისთვის. როგორი სიმულაციაც არ უნდა განახორციელოს სააკაშვილმა, ამას ვერ ექნება ვერანაირი წარმატება.

შიმშილობაზე პასუხისმგებელია მოშიმშილე, რომელიც უმძიმესი დამნაშავეა, სამარცხვინო დამნაშავე, მიხეილ სააკაშვილი, რომლის დაკვეთითაც ადამიანებს აწამებდნენ, აუპატიურებდნენ, ბიზნესებს ართმევდნენ და ა.შ. ამის გამო მან უნდა მოინანიოს, კი არ უნდა იშიმშილოს. მისი უფლებაა იყოს სამარცხვინო", — აცხადებს კობახიძე

29 ოქტომბერს, სახელმწიფო უსაფრთხოების სამსახურში სპეციალური ბრიფინგი გაიმართა, სადაც განაცხადეს, რომ სააკაშვილის ჯანმრთელობის მდგომარეობის გაუარესების შემთხვევაში მისი გლდანის #8 სასჯელაღსრულების დაწესებულებაში გადაყვანის დროს ხელის შეშლა იგეგმებოდა. უწყებამ გამოძიება სახელმწიფო ხელისუფლების დამხობის მიზნით შეთქმულების საქმეზე დაიწყო.

სუს-ის თანახმად, საუბარი იყო აღნიშნული სასჯელაღსრულების დაწესებულებასთან მისასვლელი საავტომობილო გზების სხვადასხვა საშუალებით ბლოკირებასთან. უწყებაში, ასევე, ამბობენ, რომ მსგავს ქმედებებს მიხეილ სააკაშვილის სხვა დაწესებულებებში გადაყვანის დროსაც შესაძლოა ჰქონდეს ადგილი.

საქართველოს მესამე პრეზიდენტი დაკავებიდან, უკვე 30-ე დღეა შიმშილობს.