ცესკოს ცნობით, საარჩევნო უბნებზე ცალკეულ შემთხვევებში დაფიქსირდა პროცედურული ხარვეზები, თუმცა აღნიშნული არ გამხდარა ხმის მიცემის პროცესის შეწყვეტის საფუძველი.

ცესკოს პრეს-სპიკერის ნათია იოსელიანის ცნობით, ვაზისუბნის 62-ე უბანზე ელექტროენერგია გაითიშა მოკლე ჩართვის გამო, მალევე აღდგა მოწოდება და მომხდარს ხელი არ შეუშლია საარჩევნო პროცესისთვის.

მან, ასევე, განცხადება გააკეთა ქუთაისში 43-ე უბანზე, ფანჯარაზე ქვების სროლის ფაქტზე, მისი თქმით, უცნობია, ვინ ჩაიდინა ეს ქმედება, თუმცა პოლიცია გამოძახებულია და საარჩევნო უბანზე ხელი არ შეშლია პროცესს.

ცესკოს პრეს-სპიკერსი ცნობით, საოლქო საარჩევნო კომისიაში შევიდა საჩივარი ვაზისუბანში ქართული ოცნების კოორდინატორების მიერ საარჩევნო ყუთში ბიულეტენების ჩაყრის თაობაზე. მისი თქმით, ოლქის თავმჯდჯომარე უბანზე იყო მისული, საჩივარი არსებობს და კომისია მიიღებს შესაბამის გადაწყვეტილებას.

ნათია იოსელიანი განმარტავს, რომ სენაკის 1-ლ საარჩევნო უბანზე, იმის შემდეგ, რაც მედიის წარმომადგენელი ფოტო-ვიდეო გადაღების 10-წუთიანი ვადის გასვლის შემდეგ არ დაექვემდებარა თავმჯდომარის მითითებას დაეტოვებინა უბანი, "თავმჯდომარე იძულებული გახდა, მედიის წარმომადგენელს დაეტოვებინა საარჩევნო უბანი".

ცესკოს ცნობით, ასევე, ქარელში, 42-ე საარჩევნო უბანთან ინციდენტი მოხდა საარჩევნო სუბიექტსა და მედიის თანამშრომელს შორის და ორივე გადაყვანილია დაკითხვაზე.

მან, ასევე განმარტა შემთხვევები პირადობის მოწმობებში შეცვლილი გვარების შესახებ. ნათია იოსელიანის თქმით, ორივე შემთხვევა გვარის ცვლილებასთან იყო დაკავშირებული, ამომრჩევლები ამომრჩეველთა ერთიან სიაში სახელმწიფო სერვისების განვითარების საააგენტოს მოწოდებული სიის საფუძველზე იყვნენ შეყვანილი, შესაბამისად, ისინი მხოლოდ ერთხელ შეძლებდნენ ხმის მიცემას.

ცესკოს ცნობით, კომისიის კონტაქტ-ჰაბში 07:00 საათიდან 20:00 საათამდე შევიდა 1318 სატელეფონო ზარი და 262 ონლაინ შეტყობინება. ცესკოს ცნობით, მათი დიდი ნაწილი ამომრჩევლების მიერ სიაში მონაცემების გადამოწმებას, საარჩევნო უბნის მისამართებისა და საარჩევნო პროცედურების დაზუსტებას შეეხებოდა.