ლატვიის საგარეო საქმეთა სამინისტრო შეშფოთებას გამოხატავს აფხაზეთსა და სამხრეთ ოსეთში განვითარებული მოვლენების მიმართ და მტკიცე მხარდაჭერას უცხადებს საქართველოს სუვერენიტეტსა და ტერიტორიულ მთლიანობას. ამის შესახებ, უწყება განცხადებას ავრცელებს:

"არალეგიტიმური რეჟიმის მიერ, საქართველოს ადმინისტრაციული საზღვრის გადალახვის შეზღუდვა, აფხაზეთის რეგიონში მცხოვრებთათვის, ეწინააღმდეგება მოსახლეობის უსაფრთხოებისა და ცხოვრების პირობების გაუმჯობესებას.

ლატვია არ აღიარებს ე.წ. საპარლამენტო არჩევნებს, რომელიც მარტში, აფხაზეთის რეგიონში, არალეგალურად ჩატარდა. ასევე, ლატვია არ აღიარებს, საქართველოს რეგიონში, სამხრეთ ოსეთში, აპრილში დაგეგმილ საპარლამენტო არჩევნებსა და რეფერენდუმს.

სეპარატისტული რეჟიმების მხრიდან განხორციელებული ასეთი ქმედებები, ხელს არ უწყობს კონფლიქტის მშვიდობიან მოგვარებას.

ჩვენ მოვუწოდებთ კონფლიქტში მონაწილე მხარეებს, კონსტრუქციულად ჩაერთონ ჟენევის მოლაპარაკებებში".