სახელმწიფო უსაფრთხოების სამსახური განმარტავს, რატომ გაავრცელა სახელმწიფო ხელისუფლების დასამხობად შეთქმულების საქმესთან დაკავშირებული ფარული აუდიო ჩანაწერი. საუბარია ფარულ ჩანაწერზე, რომელიც უწყებამ გუშინ, 29 ოქტომბერს გაავრცელა. სუს-ის განცხადებით ჩანაწერი ასახული საუბარი მიხეილ სააკაშვილის საპრეზიდენტო ბიბლიოთეკაში მიმდინარეობს და ის სასამართლო განჩინების საფუძველზე არის მოპოვებული.

"გუშინ გავრცელებულ ჩანაწერში ნათლად გამოჩნდა თუ როგორ საუბრობდნენ ცალკეული პირები დესტრუქციული ძალების მობილიზებაზე, ავტომანქანებით გზების ჩახერგვაზე, სახელმწიფო უწყებების ბლოკირებასა და შტურმზე და უფრო მეტიც, იმაზე, რომ სასურველი შედეგის მიღწევა სისხლის დაღვრის გარეშე შეუძლებელია.

სწორედ ამიტომ მოვახდინეთ საზოგადოებისათვის მოსამართლის განჩინების საფუძველზე მოპოვებული მტკიცებულებების მიწოდება, რაც აგრეთვე მიზნად ისახავდა პრევენციული ღონისძიებების გატარებას და მოსახლეობის ინფორმირებას კონკრეტული ჯგუფის რეალური მიზნების თაობაზე, რათა მოქალაქეებმა ნებსით თუ უნებლიედ მონაწილეობა არ მიიღონ ქმედებაში, რომელიც წარმოადგენს დანაშაულს და მიმართულია საქართველოს კონსტიტუციით დადგენილი სამართლებრივი წესრიგის წინააღმდეგ", — ვკითხულობთ უწყების მიერ გავრცელებულ განცხადებაში.

უწყებაში საჭიროდ მიიჩნიეს კიდევ ერთხელ განემარტათ ის, რაც გუშინდელ ბრიფინგზე უკვე თქვეს. კონკრეტულად, სუს-ში ამტკიცებენ, რომ გამოძიების დაწყება ლეგიტიმური იყო და მისი მიზანი "დანაშაულის გამოვლენა, აღკვეთა და მის განხორციელებაში ჩართული პირების მიმართ კანონმდებლობით გათვალისწინებული სათანადო ზომების გატარებაა".

სახელმწიფო უსაფრთხოების სამსახური აღნიშნულ საქმეს სსკ-ის 315-ე მუხლის პირველი ნაწილით იძიებს, რაც სახელმწიფო ხელისუფლების დასამხობად შეთქმულებას გულისხმობს. დანაშაული სასჯელის სახედ და ზომად თავისუფლების აღკვეთას 5-დან 8 წლამდე ვადით ითვალისწინებს.

გუშინ სახელმწიფო უსაფრთხოების სამსახურში სპეციალური ბრიფინგი გამართეს, სადაც განაცხადეს, რომ ექსპრეზიდენტ მიხეილ სააკაშვილის ჯანმრთელობის მდგომარეობის გაუარესების შემთხვევაში მისი გლდანის #8 სასჯელაღსრულების დაწესებულებაში გადაყვანის დროს ხელის შეშლა იგეგმებოდა.

გარდა ამისა, უწყებამ გამოაქვეყნა 6-წუთიანი აუდიოჩანაწერი. ვიდეოში ისმის რამდენიმე ადამიანის საუბარი, რომლებიც მიხეილ სააკაშვილის გათავისუფლების შესაძლებლობებზე საუბრობენ. სუს-ის ინფორმაციით, ერთ-ერთი მათგანი ნაციონალური მოძრაობის პოლიტსაბჭოს წევრი, ბესიკ წერედიანია. ჩანაწერის მიხედვით, წერედიანი გეგმავს აქციებს პრემიერიმინისტრის, ასევე, იუსტიციისა და ჯანდაცვის მინისტრების სახლებთან. ჩანაწერიში საუბარი ეხება "ციხის ჩაკეტვასაც". სუს-ის ჩანაწერში, სავარაუდოდ, წერედიანი ამბობს, რომ 100-150 მანქანით ჩაიკეტება გლდანის ციხისკენ მიმავალი გზები. გარდა ამისა, ჩანაწერში ითქვა, რომ პროცესი იქამდე უნდა მიიყვანონ, რომ ქართულ ოცნებას "საზიზღარი მეთოდებით მოუწიოს" არჩევნების გაყალბება, რასაც ქუჩაში გამოსვლა და "მეიდანი" მოჰყვება.