ევროპული საქართველოს წევრის, გიორგი ნონიაშვილის განცხადებით, პრემიერმინისტრ ირაკლი ღარიბაშვილის მიერ ოპოზიციის მერობის კანდიდატების არჩევნებში გამარჯვებასთან დაკავშირებული განცხადებები, რომ მათ "ცენტრალური მთავრობის გარეშე პერსპექტივა არ აქვთ", დემოკრატიული და თვითმმართველობის იდეის წინააღმდეგ ავტორიტარული გზავნილია. ნონიაშვილის თქმით, ღარიბაშვილს არავინ ეკითხება, ვინ იქნება თბილისის მერი, რადგან ამას მოქალაქეები წყვეტენ.

"ირაკლი ღარიბაშვილს არავინ არ ჰკითხავს, თუ ვინ გახდება თბილისის მერი, ამას გადაწყვეტენ საქართველოს მოქალაქეები. რაც შეეხება მის განცხადებას, ეს არის ღიად ავტორიტარული გზავნილი დემოკრატიული იდეის წინააღმდეგ და თვითმმართველობის იდეის წინააღმდეგ, იმის წინააღმდეგ, რომ ადამიანებმა გადაწყვიტონ, ვის აირჩევენ და არა ცენტრალურმა ხელისუფლებამ, რომელსაც ნებისმიერი თვითმმართველობის სრული კონტროლი სურს", — განაცხადა ნონიაშვილმა.

ირაკლი ღარიბაშვილი რაიონებში წინასაარჩევნო შეხვედრებზე ოპოზიციის მადისკრედიტირებელ განცხადებებს აგრძელებს. პრემიერმინისტრმა სენაკში შეხვედრის შემდეგ მედიასთან განაცხადა, რომ ენმ-ის სენაკის მერობის კანდიდატს, კობა ნაყოფიას სენაკის მერობა სურს, როცა იქ სახლიც კი არ აქვს. მისი თქმით, თუ ნაყოფია გაიმარჯვებს, "არანაირი პერსპექტივა არ აქვს", რადგან ცენტრალური ხელისუფლება მათ ხელშია.

ამასთანავე, 21 ოქტომბერს ზუგდიდში ღარიბაშვილმა განაცხადა, რომ ნაციონალური მოძრაობის მერობის კანდიდატს, ანზორ მელიას მუნიციპალიტეტის მართვის "წარმოდგენა არ აქვს" და არ იცის "რამდენი სოფელია ამ ქალაქში", ხოლო ქართული ოცნებას "ღირსეული ზუგდიდელი" და "უწესიერესი კაცი" ჰყავს კანდიდატად.

ამავე თემაზე: