დეპუტატის, სალომე სამადაშვილის განცხადებით, არ აქვს მოლოდინი, რომ 14 ოქტომბრის აქციის შემდეგ ექსპრეზიდენტ მიხეილ სააკაშვილს პატიმრობიდან გაათავისუფლებენ. მისი თქმით, ნაციონალურ მოძრაობისთვის პრიორიტეტი, პირველ რიგში, იმის დამტკიცება უნდა იყოს, რომ მზადაა სხვა პარტიებთან ითანამშრომლოს.

"მე არ მჯერა არცერთი წამით, რომ ხვალინდელი აქციის შედეგად ვინმე გაათავისუფლებს მიხეილ სააკაშვილს პატიმრობიდან. ეს ყველას უნდა ესმოდეს. სკეპტიკოსებს შორის არ ვარ, უბრალოდ წარმოუდგენელია და არ მოხდება ეს. მე მგონი, მიხეილ სააკაშვილს თავადაც არ აქვს მოლოდინი, რომ ხვალინდელი აქცია გახდება გასაღები მისი.

მე ვარ რეალისტი და ეს იყო ყოველთვის ჩემი პოზიცია, მათ შორის, მიშელის დოკუმენტთან დაკავშირებით, როდესაც ნაციონალური მოძრაობა ამბობდა, რომ ნიკა მელია როგორც უნდა ისე გაათავისუფლონ, მე ვამბობდი, რომ როგორც უნდა ისე არ მოხდება და შეთანხმების შედეგად უნდა გათავისუფლებულიყო", — ამბობს სამადაშვილი.

აქვე ის აღნიშნავს, რომ სურს სააკაშვილმა დატოვოს საპყრობილე, რადგან მიაჩნია, რომ ის პოლიტიკური ნიშნით არის დაპატიმრებული. დეპუტატი დასძენს, რომ პოლიტიკური დევნა მხოლოდ ხელისუფლების შეცვლის შემდეგ დასრულდება, ამიტომ, ახლა ყველაზე მნიშვნელოვანი არჩევნების მეორე ტურში გამარჯვებაა.

ამასთან, სამადაშვილი აღნიშნავს, რომ ენმ–ის მიერ საწინააღმდეგოს მტკიცების მიუხედავად, დაანონსებული აქცია პარტიულია, რადგან მრავალპარტიული აქციების დაგეგმვა სხვაგვარად ხდება.

"თუ მათ მიაჩნიათ, რომ ეს აქცია მათ ეხმარებათ, იმისთვის, რომ ნაციონალური მოძრაობის ელექტორატი დამუხტონ არჩევნების მეორე ტურის წინ, ეს, ცხადია, არის მათი არჩევანი. მე მიმაჩნია, მეორე ტურებში გასამარჯვებლად ბევრად უფრო მნიშვნელოვანია, რომ ნაციონალური მოძრაობის კანდიდატებმა გაზარდონ მხარდაჭერა საზოგადოებაში, იმიტომ რომ მიხეილ სააკაშვილის დაბრუნებამ უკვე მაქსიმალურ ნიშნულზე მიიყვანა ნაციონალური მოძრაობის მხარდამჭერები პირველ ტურზე", — ამბობს სამადაშვილი.

ხვალ, 14 ოქტომბერს ერთიანი ნაციონალური მოძრაობა სააკაშვილის გათავისუფლების მოთხოვნით აქციას ატარებს. როგორც პარტიაში ამბობენ, აქციაზე ხალხი რეგიონებიდანაც ჩამოვა. აქცია რამდენიმე პოლიტიკური პარტია, მათ შორის, ევროპული საქართველო, გირჩი — მეტი თავისუფლება, სტრატეგია აღმაშენებელი, ლელო და სხვები არ უერთდებიან.

პირველ ოქტომბერს მიხეილ სააკაშვილი დააკავეს. მანამდე, ექსპრეზიდენტი აქტიურად აცხადებდა, რომ გეგმავდა საქართველოში დაბრუნებას. 27 სექტემბერს მან თვითმფრინავის ბილეთი გაავრცელა, რომლის მიხედვითაც 2 ოქტომბერს, თვითმმართველობის არჩევნების დღეს უნდა ჩამოფრენილიყო. პირველი ოქტომბრის დილით, სააკაშვილმა ფეისბუქგვერდზე პოსტი გამოაქვეყნა, რომელმაც შექმნა ვარაუდი, რომ შესაძლოა, ის უკვე საქართველოში ყოფილიყო. ამასთან, მან გაავრცელა ორი ვიდეო, სადაც ამბობდა, რომ ბათუმში იყო, ფონად კი ქალაქის ხედი ჩანდა.

პირველ ოქტომბერს, მთელი დღის განმავლობაში, ქართული ოცნების წევრები აცხადებდნენ, რომ სააკაშვილს საზღვარი არ გადმოუკვეთავს და მისი ვიდეო არაავთენტური იყო. საზღვრის გადმოკვეთა უარყო შინაგან საქმეთა სამინისტრომაც. დღის ბოლოს, პრემიერმინისტრმა, ირაკლი ღარიბაშვილმა განაცხადა, რომ ექსპრეზიდენტი დაკავებულია და გადაყვანილია პენიტენციურ დაწესებულებაში. მას არ დაუკონკრეტებია სად დააკავეს ის და გადმოკვეთილი ჰქონდა თუ არა საზღვარი.

ექსპრეზიდენტის დაკავებიდან მალევე, ნაციონალური მოძრაობის წევრებმა გაავრცელეს ინფრორმაცია, რომ ის საქართველოში ოთხი დღის განმავლობაში იმყოფებოდა. ქართული ოცნების წევრებმა კი დაიწყეს მტკიცება, რომ ინფორმაცია ყველაფრის შესახებ ჰქონდათ, მაგრამ გამოძიების ინტერესებიდან გამომდინარე სიმართლეს არ ამხელდნენ. ღარიბაშვილმა განაცხადა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება. მან ბოდიშიც კი მოუხადა თანაგუდელებს იმის გამო, რომ სიმართლეს ვერ ამბობდნენ. 4 ოქტომბერს პროკურატამ ინფორმაცია გაავრცელა, რომ სააკაშვილი საქართველოში 29 სეტემბერს შემოვიდა.

მიხეილ სააკაშვილს დაკავების დღესვე შეხვდა სახალხო დამცველი, ნინო ლომჯარია, რომელმაც ექსპრეზიდენტის მონახულების შემდეგ განაცხადა, რომ სააკაშვილი შიმშილობას იწყებდა. 7 ოქტომბერს პატრიარქის მდივანი, მამა მიქაელ ბოტკოველი რუსთავის მე–12 სასჯელაღსრულებით დაწესებულებაში სააკაშვილთან შესახვედრად მივიდა. საპატრიარქოში განაცხადეს, რომ ბოტკოველმა სააკაშვილს პატრიარქის მოკითხვა გადასცა და სთხოვეს, შეეწყვიტა შიმშილობა. ციხიდან გამოსვლის შემდეგ პატრიარქის მდივანმა განაცხადა, რომ ექსპრეზიდენტი შიმშილობის შეწყვეტას არ აპირებს.