გრაკლიან გორაზე არქეოლოგიური კვლევისას სამარხი იპოვეს, რომელშიც სამი ადამიანის ნეშტი აღმოჩნდა. ამის შესახებ ინფორმაციას საქართველოს კულტურული მემკვიდრეობის დაცვის ეროვნული სააგენტო ავრცელებს. ადგილზე გათხრები სწორედ სააგენტოს მხარდაჭერით განახლდა. ექსპედიციის ხელმძღვანელ პროფესორი ვახტანგ ლიჩელია.

"ივანე ჯავახიშვილის სახელობის თბილისის სახელმწიფო უნივერსიტეტის სტუდენტების მონაწილეობით მიმდინარე არქეოლოგიური სამუშაოების ფარგლებში, მეხუთე ტერასაზე, კლდოვან ქანში ამოკვეთილი წრიული სამარხი გამოვლინდა, რომელშიც სამი ადამიანის ნეშტი აღმოჩნდა.

მიმდინარე წელს არქეოლოგიური სამუშაოები გრაკლიანი გორის რამდენიმე ტერასაზე მიმდინარეობს. პროექტის მიზანია როგორც ახალი არქეოლოგიური მასალის გამოვლენა, ისე უკვე აღმოჩენილი არქიტექტურული ნაშთების შესწავლა და ძეგლის ტერიტორიის დაცვა-მოწესრიგება. სამუშაოების დასრულების შემდეგ, გათხრილი ტერიტორიის ნაწილი რეკულტივაციას დაექვემდებარება, რაც ძეგლის სათანადო მდგომარეობის შენარჩუნებასა და მის დაცვას ემსახურება", — წერია სააგენტოს მიერ გავრცელებულ ინფორმაციაში.