ფონდი "ქართუ" 2018 წელს ჩამოწერილ სესხებთან დაკავშირებით სოციალურ ქსელში გავრცელებულ ინფორმაციას ეხმაურება.

ფონდი განმარტავს, რომ 2018 წელს "სოციალური სოლიდარობის აქტის" ფარგლებში გამოსყიდული და ჩამოწერილი იქნა ყველა ის პრობლემური სესხი, რომელიც წინასწარ დადგენილ კრიტერიუმებს აკმაყოფილებდა — კერძოდ, ძირი თანხა არ აღემატებოდა 2 000 ლარს და მსესხებელს ბოლო ერთი წლის განმავლობაში პროცენტი არ ჰქონდა გადახდილი. ფონდის წარმომადგენლები ხაზგასმით აღნიშნავენ, რომ ვალდებულებები მხოლოდ მათი სრული პატიების მიზნით შეიძინეს და ყოველგვარი შემდგომი მოთხოვნა გამორიცხულია, ხოლო თუ ვინმეს დღეს მსგავს სესხზე დაფარვას სთხოვენ, ეს ან ტექნიკური შეცდომაა, ან აღნიშნული ვალდებულება კრიტერიუმებს თავიდანვე ვერ აკმაყოფილებდა.

"ბოლო დროს სოციალურ მედიაში გავრცელდა ყალბი ინფორმაციის შემცველი განცხადებები, რაზედაც საჭიროდ ვთვლით პასუხის გაცემას. მოგახსენებთ, რომ 2018 წელს "ფონდმა ქართუმ" "სოციალური სოლიდარობის აქტის" ფარგლებში გამოისყიდა ფიზიკური პირების ოთხი მილიარდ ას ოთხი მილიონ ოთხას ოცდაცხრა ათას ოთხას ოთხმოცდაოთხი (4’104’429’484) ლარის მოცულობის პრობლემური ვალდებულებები. ამ უპრეცენდენტო ქველმოქმედების აქტით განხორციელდა ექვსას თხუთმეტი ათას ას სამოცდაოთხი (615’164) პირის ერთი მილიონ სამას ოთხმოცდაშვიდი ათას ორას ოთხმოცდათექვსმეტი (1’387’296 ) სესხის პატიება. პროგრამა შეეხო საქართველოში მოქმედ 55 ბანკსა და სხვა სამართლებრივი ფორმის ფინანსურ ინსტიტუციას. ესოდენ დიდი მოცულობის პრობლემური სესხის ჩამოწერამ უდავოდ შეამსუბუქა მათი მდგომარეობა და გააჯანსაღა ქვეყნის ფინანსური გარემო. ფონდმა შეიძინა ყველა ის სესხი, რომლებიც აკმაყოფილებდა წინასწარ გაცხადებულ კრიტერიუმებს. კერძოდ, სესხები, რომელთა ძირი არ აღემატებოდა ორი ათას (2000) ლარს და რომელთა მიმართებაშიც მოვალეებს (ფიზიკურ პირებს) ბოლო ერთი წლის განმავლობაში არ ჰქონდათ გადახდილი სესხის პროცენტი.

აქვე ხაზს ვუსვამთ იმ გარემოებას, რომ სესხები გამოსყიდულია მხოლოდ იმ ფინანსური ინსტიტუტებისგან, რომლებმაც თანხმობა განაცხადეს ამ პროგრამაში მონაწილეობაზე. მოქალაქეებს, ვისაც ეს პროგრამა შეეხო, მათი სტატუსის გადამოწმება და შესაბამისი ცნობების აღება შეუძლიათ საკრედიტო საინფორმაციო ბიურო კრედიტინფოდან. ასევე, მოქალაქის წერილობითი მომართვის შემთხვევაში "ფონდი ქართუ" გასცემს შესაბამის ინფორმაციას (ცნობას) კონკრეტული სესხის თაობაზე. "ფონდი ქართუ" კიდევ ერთხელ აცხადებს, რომ ეს ვალდებულებები გამოისყიდა მხოლოდ მათი პატიების მიზნით და გამორიცხულია ფონდის მიერ სესხებზე რაიმე სახის მოთხოვნა. ამრიგად, თუ დღეს რომელიმე ფიზიკურ პირს საკრედიტო დაწესებულებამ მოსთხოვა ხსენებული პერიოდის სესხის დაფარვა, ეს ან შეცდომაა, რისი გადამოწმებაც მარტივად შეიძლება, ან ეს კონკრეტული ვალდებულება არ აკმაყოფილებდა დადგენილ კრიტერიუმებს და, შესაბამისად, არ მოხვდა 2018 წლის პროგრამაში. ყველა დაინტერესებულ პირს მოვუწოდებთ, არ აჰყვეს არაკეთილსინდისიერ პირთა მიერ ატეხილ აჟიოტაჟს და გადაამოწმოს თავისი ვალდებულებების სტატუსი შესაბამის სტრუქტურებში", — ნათქვამია განცხადებაში.

ცნობისთვის გუშინ სოციალურ ქსელებში გავრცელდა ცნობები, რომ მოქალაქეებს 2018 წელს ჩამოწერილი სესხების დაფარვას კვლავ სთხოვდნენ. აღნიშნულ თემაზე ვიდეომიმართვა "ვეძებ"-ის დამფუძნებელმა, თამუნა მუსერიძემაც გამოაქვეყნა.