თბილისი პრაიდი ბათუმში მომხდარი ტრაგედიის გამო მწუხარებას გამოთქვამს და გარდაცვლილის ოჯახებს უსამძიმრებს. მათივე განცხადებით, ტრაგედიის დროს გარდაცვლილთა ოჯახებისა და დაზარალებულთა დახმარების ფონდში თანხას გადარიცხავენ.

"ეს ტრაგედია კიდევ ერთხელ გვახსენებს, რამდენად მნიშვნელოვანი ღირებულებებია პასუხისმგებლობა, ზრუნვა და სოლიდარობა. ყოველ ჩვენს ქმედებას, დიდსა თუ მცირეს, საფუძვლად უნდა ედოს აზრი, რომ გავუფრთხილდეთ ერთმანეთის სიცოცხლეს, ჯანმრთელობას და ბედნიერებას", — ნათქვამია განცხადებაში.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი, გადარჩა ერთი. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე სახელმწიფო დროშები დაეშვება.