სომხეთის პრეზიდენტი არმენ სარქისიანი ბათუმში მომხდარი ტრაგედიის გამო საქართველოს უსამძიმრებს და დაღუპულთა ოჯახებს თანაგრძნობას უცხადებს. ტვიტერით სარქისიანის მიერ გავრცელებული სამძიმრის ადრესატი მისი ქართელი კოლეგა სალომე ზურაბიშვილია.

"გთხოვთ, მიიღოთ ჩემი ღრმა სამძიმარი ბათუმში შენობის ჩამონგრევის გამო, რასაც შედეგად მსხვერპლი და ადამიანთა დაშავება მოჰყვა. გულწრფელ თანაგრძნობასა და თანადგომას ვუცხადებთ დაღუპულთა ოჯახებს. სწრაფ გამოჯანმრთელებას ვუსურვებ დაშავებულებს", — წერს სარქისიანი ტვიტერზე.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი, გადარჩა ერთი. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.

ბათუმში მომხდარი ტრაგედიის გამო, 11 ოქტომბერი გლოვის დღედ გამოცხადდა. მთავრობის განკარგულებით, ორშაბათს 00:00 საათიდან, 12 ოქტომბრის 00:00 საათამდე, საქართველოს მთელს ტერიტორიაზე სახელმწიფო დროშები დაეშვება.