ბრიტანეთის საელჩო ბათუმში საცხოვრებელი კორპუსის ჩამონგრევას ეხმაურება და აცხადებს, რომ შეძრწუნებული არიან მომხდარი ტრაგედიით. ისინი გარდაცვლილთა ოჯახის წევრებსა და ახლობლებს თანაგრძნობას უცხადებენ.

"შეძრწუნებულები ვართ ბათუმში მომხდარი ტრაგედიით, რომელსაც ადამიანების სიცოცხლე ემსხვერპლა. ვუთანაგრძნობთ გარდაცვლილთა ოჯახებს და ახლობლებს. გამოჯანმრთელებას ვუსურვებთ დაშავებულებს. ქედს ვიხრით ყველა იმ ადამიანის ძალისხმევის წინაშე, რომლებიც ამ წუთებამდე მუშაობენ ტრაგედიის ადგილზე", — ნათქვამია საელჩოს განცხადებაში.

ბათუმში მომხდარი უბედური შემთხვევის გამო მწუხარება გამოხატა და დაღუპულთა ოჯახებს მიუსამძიმრა აზერბაიჯანის საგარეო საქმეთა სამინისტრომ და სომხეთის საგარეო საქმეთა სამინისტრომ. დაზარალებულებს თანაგრძნობა გამოუცხადა აშშ-ის საელჩომაც.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. ბოლო ინფორმაციით, დაღუპულია 9 ადამიანი, გადარჩა ერთი. დაღუპულებს შორის 3 არასრულწლოვანია, ერთი 7 წლის, მეორე წლისა და 3 თვის და მესამე 12 წლის.

ბათუმში სამაშველო ღონისძიება თითქმის 30 საათის განმავლობაში მიმდინარეობდა.