მოქალაქეები, რომელთა ოჯახის წევრებიც ჩამონგრეულ კორპუსში იმყოფებოდნენ, ნათესავებს ვერ უკავშირდებიან. ისინი ამბობენ, რომ ოჯახის წევრები ტელეფონზე არ პასუხობენ.

სავარაუდოდ, ჩამონგრეულ კორპუსში იმყოფებოდნენ ბავშვები.

"კონტაქტზე ვერ გავდივართ. სახლში ორი ბავშვი და დედაა. და სავარაუდოდ მაზლია მისი სახლში. მე-4 სართულზე ცხოვრობს", — ამბობს TV პირველთან ერთ-ერთი ქალი.

კიდევ ერთი ქალი ამბობს, რომ მისი ერთი შვილიშვილი სახლში ონლაინგაკვეთილზე იყო. მისივე თქმით, შვილი და რძალიც სახლში იყვნენ. ისინი მე-3 სართულზე ცხოვრობდნენ.

"რაც გავიგე ტელევიზორში მას მერე ვრეკავ, სამსახურში ვიყავი მე და იქიდან მოვდივარ. 2 შვილიშვილი მყავს, 1 სკოლაშია, მეორეს ონლაინგაკვეთილი ჰქონდა", — ამბობს ადგილზე მყოფი ერთ-ერთი ქალი.

ბათუმელებთან საუბრისას კიდევ ერთი მოქალაქე ამბობს, რომ ნანგრევებში მოყოლილია მისი 86 წლის ბებია. ვრცელდება სხვა ადამიანების კომენტარებიც, რომლებიც ოჯახის წევრებს ვერ უკავშირდებიან.

ჩამონგრეულ კორპუსში მყოფი კაცის შვილი ამბობს, რომ მამა სახლში მარტო იყო და მასთან დაკავშირებას ვერ ახერხებს.

"ტელეფონი გადის, მაგრამ არ პასუხობს. მე-5 სართულზე იყო. მარტო იყო სახლში. ოჯახის წევრია, სიძეა ჩემი", — ამბობს ადგილზე მყოფი კიდევ ერთი ქალი.

ბათუმში, 26 მაისის ქუჩაზე საცხოვრებელი კორპუსი ჩამოინგრა. მსხვერპლის შესახებ ინფორმაცია, ჯერჯერობით, არ ვრცელდება. ამ ეტაპზე უცნობია ნგრევის მიზეზიც.

ჯერჯერობით, დადსტურებულად არის ცნობილი, რომ ნანგრევებიდან მცირეწლოვანი ბავშვი გამოიყვანეს, რომელსაც სამედიცინო დახმარება აღმოუჩინეს და უკვე სახლში გაწერეს.

შინაგან საქმეთა სამინისტროს ინფორმაციით, საცხოვრებელი კორპუსის ჩამონგრევაზე გამოძიება დაწყებულია, ხოლო დაშავებულების შესახებ ინფორმაცია ზუსტდება.