მაშინ, როცა 5 ივლისის ძალადობის ორგანიზატორები დაკავებულები არ არიან, პოლიციელის გინებისთვის შინაგან საქმეთა სამინისტრო გიორგი თაბაგარის 15-დღიან ადმინისტრაციულ პატიმრობას ითხოვს. პროცესი თბილისის საქალაქო სასამართლოში დღეს გაიმართა. საქმე ეხება 5 ივლისს, იმ დროს, როცა ძალადობრივი ჯგუფი მშვიდობიან მოქალაქეებს ფიზიკურად უსწორდებოდა და თბილისი პრაიდის წარმომადგენლები უსაფრთხო სივრცის პოვნას ცდილობდნენ. გიორგი თაბაგარი ამბობს, რომ ერთი ადგილიდან მეორეზე გადასვლის დროს პოლიციელმა დაურეკა და უკვე დარბეული ოფისის კარის გაღება მოითხოვა, რის გამოც აგინა.

"იმდენი რაღაც ხდებოდა 5 ივლისს, დევნა იყო, უამრავი ადამიანი დაზარალდა და გამოკითხვაზეც კი არ დავუბარებივარ, სამ თვეზე მეტი გავიდა. დანაშაულის არც ერთი ორგანიზატორი დაკავებული არ არის და არც სამართლებრივი პასუხისმგებლობა დამდგარა ამ ადამიანების, ასეთ დროს, ჩემ დაკავებას ითხოვენ. მართალია, 15 დღით, მაგრამ მაინც აბსურდია", — ამბობს თაბაგარი On.ge-სთან.

მის ინტერესებს სასამართლოში საქართველოს დემოკრატიული ინიციატივა (GDI) იცავს. იურისტი, გიორგი ტაბატაძე აცხადებს, რომ გამოხატვის თავისუფლება შეურაცხმყოფელ განცხადებებსაც იცავს და მსგავსი ქმედების გამო ადამიანის პასუხისგებაში მიცემა არ შეიძლება.

"ჯერ ერთი, ვერ ასაბუთებენ მტკიცებულებებით გინებას და მეორეც, რომც ყოფილიყო, გამოხატვის თავისუფლება იცავს შეურაცხმყოფელ, შოკისმომგვრელ განცხადებებსაც, რომელიც შეიძლება თუნდაც პოლიციელისთვის მიუღებელი იყოს. თან ეს არ იყო პირისპირ ნათქვამი, იყო ტელეფონზე, როცა შეუძლია ტელეფონი გათიშოს, თუ არ მოსწონს გამოხატვა. არც ძალადობის საფრთხე იქმნება, არანაირი სიკეთე არ ზიანდება ამით და არ შეიძლება მსგავსი ქმედების გამო ადამიანის პასუხისგებაში მიცემა, ეს არის გამოხატვის თავისუფლების პირდაპირი დარღვევა და ეწინააღმდეგება საკონსტიტუციო სასამართლოს დამკვიდრებულ პრაქტიკას", — აცხადებს ტაბატაძე.

მისივე თქმით, მოითხოვეს პროკურორის ჩართვა, რადგან ახლა ბრალმდებელი იგივე ადამიანია, ვინც თაბაგარს ედავება.

"ეს სამართლებრივად აბსურდია და ამიტომ ვითხოვდით, რომ დამოუკიდებელი ბრალმდებელი ყოფილიყო და არა ის ადამიანი, ვისაც პრეტენზია აქვს თაბაგართან", — ამბობს ადვოკატი.

გიორგი ტაბატაძის ინფორმაციით, სასამართლო პროცესი გადაიდო და მომდევნო სხდომაც მტკიცებულებების გამოკვლევით გაგრძელდება.

თბილისი პრაიდის დამფუძნებელმა, გიორგი თაბაგარმა 4 სექტემბერს გაავრცელა ინფორმაცია, რომ შინაგან საქმეთა სამინისტრომ მის წინააღმდეგ ადმინისტრაციული საქმისწარმოება დაიწყო. როგორც თაბაგარი ჰყვება, 5 ივლისს, თბილისი პრაიდის ოფისის დარბევისა და ქუჩაში ძალადობის შემდეგ, როცა სახელმწიფომ შვიდობიანი მოქალაქეების ვერ დაიცვა, პოლიციიდან დაურეკეს და უთხრეს, რომ ზარალის აღწერისა და საგამოძიებო მოქმედებებისთვის დარბეული ოფისის კარის გაღება სურდათ. თაბაგარის თქმით, ამ დროს მოძალადეებისგან თავის დაცვის მიზნით უკვე მეოთხე სივრციდან მიდიოდნენ. ის ამბობს, რომ პოლიციელს აგინა და ადმინისტრაციული საქმისწარმოებაც ამის გამო დაიწყო.

აღსანიშნავია, რომ 5 ივლისის ჰომოფობიური და ძალადობრივი აქციის ორგანიზატორები ამ დრომდე არ არიან დასჯილები. ისინი ფიზიკურად გაუსწორდნენ 50-ზე მეტ ჟურნალისტს, დაარბიეს თბილის პრაიდის ოფისი, სცადეს სირცხვილიას ოფისში შეჭრა და თავს დაესხნენ ადამიანის უფლებათა ცენტრს, სადაც, სავარაუდოდ, ხელნაკეთი ასაფეთქებელი მოწყობილობა შეაგდეს, რის შედეგადაც ერთი ადამიანი დაშავდა. 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.