ბოლო რამდენიმე წელში წარმოშობით ფილიპინელი ბრეტმენ როკი სოციალურ მედიაში ერთ-ერთ ყველაზე ცნობილ სახედ იქცა და ახლა უკვე ფლეიბოის ყდაზე გამოჩენით ამ საკულტო ჟურნალის ისტორიის მნიშვნელოვანი ნაწილიც გახდა.

23 წლის ბრეტმენ როკმა ფლეიბოისთვის იპოზიორა, ჟურნალის გარეკანზე მოხვდა და ამით პირველი ღიად გეი კაცი გახდა, რომელიც აქამდე ფლეიბოის ყდაზე გამოუსახავთ.

ფლეიბოი უმეტესად ქალი მოდელების ფოტოებს ბეჭდავს და კაცებზე ყურადღებას ისედაც იშვიათად ამახვილებს ხოლმე, რომ აღარაფერი ვთქვათ ჟურნალის მთავარ ფოტოზე, თუმცა ბოლო წლებში ეს ტენდენცია ნელ-ნელა იცვლება: მაგალითად, პუერტორიკოელი რეპერი Bad Bunny პირველი კაცი გახდა, ვინც ფლეიბოის ყდაზე გამოჩნდა, ახლა კი უკვე ღიად გეი ბრეტმენ როკმაც შეცვალა ფლეიბოის ისტორია.

როგორც CNN წერს, ბეჭდური გამოცემის 66-წლიანი ტრადიციის შემდეგ ფეიბოიმ 2020 წელს შეწყვიტა ჟურნალის ბეჭდვა: კორონავირუსის პანდემიის გამო მიყენებული ზარალის შემდეგ მხოლოდ ონლაინ, ციფრული ფორმატი შეინარჩუნეს.

სწორედ ჟურნალის ინტერნეტგამოცემის ყდისთვის გადაიღეს ბრეტმენ როკიც კურდღლის ყურებთან ერთად, რომლებიც ფლეიბოის საფირმო ნიშანია. ცხადია, სოციალურ ქსელებში ამ ფაქტს დადებითთან ერთად უარყოფითი გამოხმაურებაც მოჰყვა.

"ამ ფოტოებს იმიტომ ვაქვეყნებ, რომ უფრო მეტი ჰეტეროსექსუალი კაცი გავაღიზიანო. და თუ მართლა გაღიზიანდი, ესე იგი, გიზიდავ და უბრალოდ გამოტყდი", — წერს როკი ინსტაგრამის პირად გვერდზე კრიტიკოსების საპასუხოდ.