ნეტფლიქსის ახალი სერიალი კალმარის თამაში სულ ცოტა ხნის წინ გამოვიდა, თუმცა საქართველოსა და მსოფლიოში სერიალების მოყვარულთა გულები მარტივად დაიპყრო. სერიალში ერთმანეთს პრიზის მოსაგებად 456 ადამიანი სასიკვდილო თამაშში ეჯიბრება. პირველ ეპიზოდში მონაწილეების შეგროვებაზე პასუხისმგებელი პერსონაჟი 456-ე მონაწილეს თამაშში ბარათით იწვევს, რომელზეც ტელეფონის ნომერია მითითებული. სერიალის გულშემატკივრებმაც არ დააყოვნეს და აღნიშნულ ნომერზე დარეკეს. როგორც აღმოჩნდა, ის ნამდვილ ადამიანს ეკუთვნის.

ტელეფონის ნომერის მფლობელის მიხედვით, დღეში 4 ათასამდე ზარს იღებს. მან კალმარის თამაშის შესახებ არაფერი იცოდა, თუმცა სიტუაცია ზარის ავტორებმა აუხსნეს. მისი თქმით, დღის ნებისმიერ მონაკვეთში ადამიანები — ძირითადად, ბავშვები და თინეიჯერები — ურეკავენ, მესიჯებსა და ფოტოებს უგზავნიან.

ნეტფლიქსმა განაცხადა, რომ სცენებს, რომლებშიც ტელეფონის ნომერია ნაჩვენები, შეცვლის.

"სერიალის მწარმოებელ კომპანია Siren Pictures-თან ერთად ამ პრობლემის გადაჭრაზე ვმუშაობთ, რაც იმ სცენების შეცვლასაც გულისხმობს, რომლებშიც ტელეფონის ნომერია ნაჩვენები", — ვკითხულობთ კომპანიის განცხადებაში.

Netflix Korea-მ სერიალის გულშემატკივრებს ნომერზე დარეკვისგან თავის შეკავებისკენ მოუწოდა. კომპანია ნომრის მფლობელისთვის კომპენსაციის გადახდასთან დაკავშირებით ჯერჯერობით განცხადებას არ ავრცელებს.

აღსანიშნავია, რომ ერთ-ერთმა სამხრეთ კორეელმა პოლიტიკოსმა ნომრის მფლობელს ნომრის სანაცვლოდ $85 000 შესთავაზა. თუმცა ისიც უნდა აღინიშნოს, რომ მფლობელს ნომერი 10 წელია აქვს და მის დათმობას მარტივად, ალბათ, არ აპირებს.

ამავე თემაზე: