ლელოს ლიდერის, ბადრი ჯაფარიძის განცხადებით, პარტია მეორე ტურში ოპოზიციურ კანდიდატებს დაუჭერს მხარს. მისივე თქმით, ეს მნიშვნელოვანია, იმისთვის, რომ დამარცხდეს ქართული ოცნება.

"ჩვენ ვაპირებთ, მხარი დავუჭიროთ ოპოზიციურ კანდიდატებს ყველა იმ საარჩევნო ოლქში, სადაც ოპოზიციური კანდიდატები გადავიდნენ მეორე ტურში გადავიდნენ, იგულისხმება მერობის კანდიდატები. ეს ძალიან მნიშვნელოვანია ჩვენი ქვეყნისთვის, რომ გაიმარჯვონ ოპოზიციონერმა კანდიდატებმა ამ დიდ ქალაქებში, რადგან ეს ნიშნავს სწორედ ცვლილებებს, ცვლილებებს, რომლებიც დაგვიკვეთა ქართველმა ხალხმა და სულ სხვა გარემოს, ბევრად უფრო ჯანმრთელს, გამჭვირვალეს. ისეთ გარემოს, სადაც უკვე შესაძლებელი იქნება, წინააღმდეგობა გავუწიოთ ქართული ოცნების მიერ დანერგილ ნეპოტიზმს, კორუფციას და შევძლოთ, ოპოზიციამ ვმართოთ ქალაქები გამჭვირვალედ, ხალხის ჩართულობით", — თქვა ჯაფარიძემ.

მეორე ტური 20 ქალაქსა თუ მუნიციპალიტეტში გაიმართება. კანონმდებლობის მიხედვით, მეორე ტური პირველი ტურიდან 4 კვირაში, ანუ 30 ოქტომბერს გაიმართება.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.