ლელოს ლიდერის, ბადრი ჯაფარიძის განცხადებით, უკვე ფაქტია, რომ ქართული ოცნება თბილისში დამარცხდა. მისი თქმით, "თბილისი დაიბრუნეს" და ახლა თითოეული ხმა უნდა დაიცვან.

"ჩვენ ახლა გვჭირდება ყველა ხმის დაცვა, თითოეული ხმისთვის უნდა ვიბრძოლოთ, უნდა გვესმოდეს, რომ ახლა ქართული ოცნება ყველანაირი ხრიკებით შეეცდება, რომ შეცვალოს ეს შედეგი, არანაირი მცდელობა არ გამოუვათ. ჩვენ ვხედავთ, რომ დამაჯერებლად იგებს ოპოზიცია თბილისში, მგონია, რომ სხვა ქალაქებშიც იმავე ვითარება გვექნება. ასე რომ, მე მინდა გითხრათ, რომ ეს არის უკვე ფაქტი, ჩვენ თბილისი დავიბრუნეთ და ახლა გვჭირდება, ზუსტად მივიღოთ ის შედეგი, რომელიც ხალხის ნებიდან გამომდინარე გვეკუთვნის ოპოზიციას", — განაცხადა მან მთავარ არხთან კომენტარში.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის (მხოლოდ თბილისი) თანახმად, მმართველ გუნდის შედეგი 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.