გირჩი — მეტი თავისუფლების ლიდერი, ზურაბ ჯაფარიძე IPSOS-ის ეგზიტპოლების შედეგებს აფასებს და ამბობს, რომ დედაქალაქის "გადატეხვა" არჩევნების წაგებას ნიშნავს, რადგან დედაქალაქში გაყალბების ნაკლები შესაძლებლობაა.

"ოპოზიციის დედაქალაქში გამარჯვება არის ძალიან მნიშვნელოვანი. მე არ ვთვლი, რომ ეს არჩევნები თავისუფალ და კონკურენტულ გარემოში ჩატარდა. ამას ადასტურებს არჩევნების წინა პერიოდიც და დღევანდელი დღეც და ამის მრავალი ფაქტი არსებობს. თბილისის წაგება ნიშნავს არჩევნების წაგებას, რადგან დედაქალაქში დაკვირვება არის ბევრად უფრო ინტენსიური. რეგიონებში ხდებოდა კატასტროფა და ამას ვხედავდით ყველა", — განაცხადა ჯაფარიძემ.

მან იმედი გამოთქვა, რომ საერთაშორისო დამკვირვებლები ძალადობის, დაშინების და მოსყიდვის წინასაარჩევნო მდგომარეობას სწორად შეაფასებენ და აღნიშნა, რომ ახლა ხმების დაცვა ყველაზე მნიშვნელოვანია.

"ახლა მნიშვნელოვანია დილამდე დავიცვათ ყველა ხმა, რათა არ მოხდეს კიდევ რაღაცების ჩასწორება და გაყალბება. მეტიც, მე ეჭვი მაქვს, რომ რეგიონებში რაც ვნახე, ეგზიტპოლებშიც კი ხალხს აქვს შიში თქვან თავისი რეალური აზრი, შესაძლოა შედეგები კიდევ უფრო გადაიხაროს ოპოზიციის მხარეს", — ამბობს ზურაბ ჯაფარიძე.