ყოფილმა პრემიერმინისტრმა, ბიძინა ივანიშვილმა საარჩევნო უბანი უკომენტაროდ დატოვა. ის ხმის მისაცემად უბნის გახსნიდან რამდენიმე წუთში, ცოლთან ერთად მივიდა. ჟურნალისტებს მასთან კითხვები მიმდინარე პოლიტიკურ პროცესებთან დაკავშირებით ჰქონდათ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.