თბილისის მოქმედი მერისა და ქართული ოცნების მერობის კანდიდატის, კახა კალაძის თქმით, გიორგი გახარიას გადადგომა განსაკუთრებული თამაშის დროს გუნდის კაპიტნის მოედნიდან გასვლას ჰგავს.

"სად გარბიხარ, რო გარბიხარ, კანონი უნდა აღასრულო, ქვეყნის პირველი პირი ხარ, სად მირბიხარ, სად მიდიხარ. ეგ იგივეა, რომ განსაკუთრებული თამაში რომ იყოს, გუნდის თამაში იწყებოდეს და გუნდის კაპიტანი მოედნიდან გამოვიდეს, დატოვოს, წავედი მე სახლში, მივდივარ, აღარ მინდა თამაში. ეს რა იყო? ან იქ რა უნდა დღეს გიორგი გახარიას? ან რა უნდა ჩემ წინააღმდეგ დღეს გიორგი გახარიას? ხო დარწმუნებულია იმაში, ხო იცის, რომ შანსი არ აქვს, ვერ მოიგებს. რა იყო მისი შემოსვლის მიზეზი და მიზანი ამ საარჩევნო გარემოში", — განაცხადა კალაძემ ტელეკომპანია იმედის ეთერში.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის.

1 სექტემბერს ექსპრემიერმა განაცხადა, რომ თბილისის მერობისთვის იბრძოლებდა.