ერთიანი ნაციონალური მოძრაობის ლიდერის, ნიკა მელიას განცხადებით, მისი და ყოფილი შინაგან საქმეთა მინისტრის, ვანო მერაბიშვილის ერთ პარტიაში თანამშრომლობა გამორიცხულია. ამის შესახებ მან ტელევიზიებთან გამართულ პრესკონფერენციაზე ისაუბრა.

"ვანო მერაბიშვილი არანაირ პოლიტიკურ, პარტიულ თანამდებობაზე არ არის. მე პატივს ვცემ ყველა იმ ადამიანს ვისაც ამ ქვეყნისთვის ძალიან ბევრი რამ უკეთებია. მართლაც, მიუხედავად დიდი შეცდომებისა, მაგრამ მე ვთქვი არ ვიქნები ახლა ორიგინალური, რომ ადამიანი, ვისზეც თქვენ საუბრობთ და ჩემი თანამშრომლობა ერთ პარტიაში უბრალოდ არის გამორიცხული. გამორიცხულია და ეს არ მიუთითებს, რომ ჩვენს შორის არის კონფლიქტი, უბრალოდ გამორიცხულია", — თქვა ნიკა მელიამ.

მსგავსი შინაარსის განცხადება ნიკა მელიამ 2020 წლის 17 სექტემბერსაც გააკეთა. მელიამ TV პირველის ეთერში თქვა, რომ საკუთარ თავს ვერ ხედავს იმ გუნდში, სადაც იქნება ვანო მერაბიშვილი. მისივე თქმით, ვანო მერაბიშვილის ცოდნა უნდა გამოადგეს ქვეყანას, თუმცა მას, ასევე აქვს ე.წ. ნეგატიური გამოცდილება.