პარტია ლელოს ლიდერმა, მამუკა ხაზარაძემ განაცხადა, რომ საქართველოს პარლამენტის თავმჯდომარეს, კახა კუჭავას პროგრესულ ადამიანად მიიჩნევს. მიუხედავად კახა კუჭავას განცხადებისა, რომ რა შედეგითაც არ უნდა დასრულდეს თვითმმართველობის არჩევნები, რიგგარეშე არჩევნები არ ჩატარდება, ხაზარაძე ფიქრობს, რომ "გულის სიღრმეში" კუჭავას არ სჯერა იმის, რასაც ამბობს.

"მე მჯერა, რომ თვითონ ბატონ კუჭავას გულის სიღრმეში არ სჯერა იმის, რასაც ამბობს და როგორც ახალგაზრდა და მე მაინც ვთვლი, რომ იგი, ვთვლი კი არა, ასეა, პროგრესულ ადამიანად მიმაჩნია, იგი გულის სიღრმეში გრძნობს, რომ ამ ქვეყანას სჭირდება რიგგარეშე არჩევნები, ამ ქვეყანას სჭირდება კოალიციური მთავრობა. ესე ფიქრობს ბევრი ქართულ ოცნებაში, უბრალოდ არ ფიქრობს ის ნაწილი ქართული ოცნების, ვისაც დასაკარგი აქვს ძალაუფლება, ძალაუფლებას თუ დაკარგავენ მათ ჰგონიათ, რომ ცხოვრება დამთავრდა", — განაცხადა მან TV პირველის ეთერში.

საქართველოში ადგილობრივი თვითმმართველობის არჩევნები 2 ოქტომბერს გაიმართება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.