არსებობს მრავალი მოცემულობა, რომელიც ბავშვობიდან ჩაგვიბეჭდეს თავში და არასდროს დავინტერესებულვართ — "რატომ?"

მაგალითად, ის რომ გაზიანი სასმელები ჯანმრთელობისთვის მავნეა — ეს ცნობილია, მაგრამ რა გავლენა აქვს მას ორგანოთა სისტემაზე, შესაძლოა არც კი ვიცოდეთ.

1. შეიცავს შაქრის განუზომელ რაოდენობას

ნახშირწყლების სხვადასხვა ტიპების გარჩევაზე რომ არ მოგაცდინოთ, მხოლოდ საქარიდები განვიხილოთ. მეთვრამეტე საუკუნეში გერმანელმა მეცნიერმა ახარდმა ჭარხლიდან კრისტალური შაქრის მიღების ტექნოლოგია შექმნა, რის შემდეგაც აღნიშნული სიტკბოება არა ფუფუნების საგანი, არამედ ყოველდღიური რაციონის განუყოფელი ნაწილი გახდა.

თუმცა, ფაქტია, რაფინირებული შაქარი ჯანმრთელობისთვის მავნეა. რაფინირების პროცესში სასარგებლო ელემენტებისგან სრულად დაცლილი ნივთიერება კალორიების ნამდვილი ბუდე ხდება. ორგანიზმს ზედმეტად დიდი ენერგიის დახარჯვა უწევს მის გადასამუშავებლად და ხშირია მეტაბოლური პრობლემები.

2. თხევადი კალორიები ითვლება

ნივთიერებათა ცვლის დარღვევა და ჭარბად მიღებული თხევადი კალორიები, რომელიც არ ავსებს კუჭს და არ ანაყრებს ადამიანს, ადვილად გარდაიქმნება მომატებულ კილოგრამებად.

3. მეტაბოლური პრობლემების შედეგია ღვიძლის გაცხიმოვნება

და მაინც — ქიმია. გლუკოზის მონელება ორგანიზმის ყველა უჯრედს შეუძლია, აი ფრუქტოზის გადამუშავება კი ღვიძლს აკისრია. ჭარბი გლუკოზა ღვიძლში გროვდება გლიკოგენის სახით.

მაშინ, როცა გაზიანი სასმელებს ვსვამთ, ღვიძლში არსებული გლიკოგენის "შენახვის მარაგი" კი ლიმიტსაა მიღწეული, იწყება გაცხიმოვნების პროცესი. სწორედ ამიტომ, ბევრ გამხდარ ადამიანსაც კი აწუხებს აღნიშნული პრობლემა.

4. იწვევს ინსულინრეზისტენტობასა და მეტაბოლურ სინდრომს

საშიშად ჟღერს, თუმცა ფაქტია, რომ სისხლის მიმოქცევისას, ჰორმონ ინსულინს მიაქვს გლუკოზა თითოეულ უჯრედამდე, თუმცა როცა ინსულინრეზისტენტობა ვითარდება, ეს პროცესი ირღვევა და უჯრედის მგრძნობელობა ქვეითდება. ეს იწვევს ჭარბ, აუთვისებელ გლუკოზას სისხლში და შესაძლოა განვითარდეს: ათეროსკლეროზი, სიმსუქნე, არტერიული წნევის მატება და სხვა.

5. აზიანებს საჭმლის მომნელებელ სისტემას

ნაწლავური ფლორის დარღვევამ შესაძლოა სოკოვან დაავადებამდეც კი მიგვიყვანოს. გარდა ამისა, მეტაბოლიზმის დარღვევის კვალდაკვალ იმატებს ანთებითი და ინფექციური დაავადებების რისკი.

6. იწვევს დიაბეტს

ყველაფერ ზემოთქმულზე დაყრდნობით, რთული არაა მივხდეთ, რომ გაზიანი სასმელის ჭარბი მიღება შესაძლოა გახდეს მთავარი მაპროვოცირებელი ფაქტორი მეორე ტიპის დიაბეტის განვითარებისთვის.

7. იწვევს დამოკიდებულებას

შაქრის გაზიანი სასმელის სახით მიღებისას ტვინში დოპამინი გამომუშავდება, რაც სიამოვნებას ანიჭებს მომხარებელს და ბუნებრივია, რომ გაზიან სასმელზე დამოკიდებულება ადვილად ვითარდება და, ფაქტობრივად, შეუძლებელი ხდება მისი ყოველდღიური რაციონიდან ამოგდება.

როგორც ხედავთ, ზედაპირული ფრაზის — "მავნეა ჯანმრთელობისთვის" — უკან შემაშფოთებელი რეალობაა და გაზიანი სასმელების დიდი დოზით მიღება ზიანს აყენებს ჯანმრთელი ადამიანის ორგანიზმსაც კი.

გააკეთეთ სწორი არჩევანი. აირჩიეთ ჯანმრთელობა ყოველდღე.