ქართული ოცნების პოლიტსაბჭოს წვერის, ნიკოლოზ სამხარაძის თქმით, პარტიის თავმჯდომარის, ირაკლი კობახიძისა და ნაციონალური მოძრაობის ლიდერის, ნიკა მელიას დაპირისპირების ქართული ოცნებისთვის დაბრალება უნამუსობაა.

"ერთი ქართული ანდაზა არსებობს, გაღმა შეედავე და გამოღმა შეგრჩებაო, ეს არის ზუსტად მათი ტაქტიკა. როდესაც ყველამ პირდაპირ ეთერში ნახა, როგორ მიეჭრა ნაცმოძრაობის თავმჯდომარე ქართული ოცნების თავმჯდომარეს, როდესაც ის თქვენს კოლეგებთან საუბრობდა და ინტერვიუს აძლევდა. ამას როდესაც პირდაპირ ეთერში ნახავ და ცდილობ, ამის დატრიალებას და და ამის დაბრალებას ქართული ოცნებისთვის, ეს არაფერია სხვა, თუ არა უნამუსობა", — აღნიშნავს სამხარაძე.

23 სექტემბერს, ევროკავშირის ოფისთან, ნიკა მელია და ირაკლი კობახიძე ერთმანეთს დაუპირისპირდნენ. ინციდენტი მაშინ მოხდა, როცა კობახიძე ჟურნალისტებს კომენტარს აძლევდა. ადგილზე მელიას მისვლის შემდეგ ჯერ სიტყვიერი დაპირისპირება დაიწყო, შემდეგ კი ერთმანეთისკენ ფიზიკურად გაიწიეს.

ისინი ერთმანეთს ხელებს უქნევნდნენ, მუშტი ჰქონდათ მოღერებული, მათ შორის კი ჟურნალისტები და ოპერატორები იდგნენ. კობახიძეს რამდენჯერმე მუშტი დაუჭირეს, ხოლო მელიამ მიკროფონზე მიუთითა და მმართველი გუნდის თავმჯდომარეს ჰკითხა, "გინდა გესროლო?". მოგვიანებით კობახიძე დაცვამ ადგილიდან გაიყვანა.

შეგახსენებთ, რომ პარტიების ლიდერები საქართველოში ევროკავშირის ელჩთან, კარლ ჰარცელთან წინასაარჩევნო გარემოზე სასაუბროდ მივიდნენ.

გაიგე მეტი: