გირჩი — მეტი თავისუფლების ლიდერი, ზურაბ ჯაფარიძე აცხადებს, რომ ენკას მხრიდან მთავრობასთან ნამახვანჰესის ხელშეკრულების შეწყვეტა კიდევ ერთხელ სიბნელის, უტვინობის და უსამართლობის გამარჯვებაა.

"გილოცავთ, სიბნელემ, უტვინობამ და უსამართლობამ კიდევ ერთხელ გაიმარჯვა, რადგან ივანიშვილს არ სურს ხმების და შესაბამისად, ძალაუფლების დაკარგვა. ეს არ არის მხოლოდ დაკარგული 800 მილიონი დოლარი, აქ ფულს აღარავინ ჩადებს, სანამ ეს ხელისუფლებაა. ეს ხელისუფლება არის გარანტირებული სიღარიბის რეცეპტი", — წერს ჯაფარიძე.

ENKA საქართველოს მთავრობასთან ხელშეკრულებას წყვეტს და ნამახვანჰესს აღარ ააშენებს. აღნიშნული სტამბულის საფონდო ბირჟაზე გავრცელებულ განცხადებაშია ნათქვამი.

"ENKA Renewables LLC-მა აცნობა საქართველოს მთავრობას, რომ შეწყდეს მშენებლობა-ექსპლუატაციის შეთანხმება, რომელიც ხელმოწერილი იყო 2019 წლის 25 აპრილს ნამახვანჰესის კასკადის პროექტის მშენებლობის, ექსპლუატაციისა და ფლობის შესახებ, კონტრაქტის პირობების დარღვევისა და ფორსმაჟორის გამო", — წერია განცხადებაში.