ოკუპირებული აფხაზეთის დროებითი დაკავების იზოლატორში 24 წლის ანრი ატეიბას გარდაცვალებას დემოკრატიის კვლევის ინსტიტუტი (DRI) ადამიანის ფუნდამენტური უფლებების დარღვევების სავარაუდო ფაქტად აფასებს და სრულ პასუხისმგებლობას აფხაზეთის დე ფაქტო ხელისუფლებას აკისრებს.

12 აგვისტოს გაგრის რაიონის დე ფაქტო შინაგან საქმეთა სამინისტროს დროებითი დაკავების იზოლატორში ანრი ატეიბა უგონო მდგომარეობაში იპოვეს. ახალგაზრდა კომატოზურ მდგომარეობაში ერთი თვე იმყოფებოდა და 14 სექტემბერს გარდაიცვალა.

როგორც აფხაზეთის დე ფაქტო შსს აცხადებს, 5 ივლისს ატეიბამ გაგრის კრიმინალური საგამოძიებო დეპარტამენტის უფროსს წინააღმდეგობა გაუწია მას შემდეგ, რაც ნარკოლოგიური ტესტის გავლა მოსთხოვეს. ზემოაღნიშნული შემთხვევის გამო, ატეიბა 7 აგვისტოს დააკავეს და ბრალად გაგრის კრიმინალური საგამოძიებო დეპარტამენტის უფროსის მიმართ ძალადობა, მისი სიცოცხლისა და ჯანმრთელობისათვის საშიშ მდგომარეობაში ჩაგდება წაუყენეს.

2021 წლის 8 აგვისტოს, ანრი ატეიბას ადვოკატმა გაგრის რაიონის დე ფატო პროკურატურას მიმართა განცხადებით, რომ მის დაცვის ქვეშ მყოფს ცემისა და წამების გამო სხეულზე მრავლობითი დაზიანებები აღენიშნებოდა და სასამართლო სამედიცინო ექსპერტიზა მოითხოვა. თუმცა 2021 წლის 12 აგვისტოს დილის 01:30 საათზე, იგი საკანში უგონო მდგომარეობაში იპოვეს და საავადმყოფოში გადაიყვანეს, სადაც ერთი თვის შემდეგ გარდაიცვალა.

ოკუპირებული აფხაზეთის შინაგან საქმეთა სამინისტროს განცხადებით, დაკავებული თვითმკვლელობას ცდილობდა.

"სახეზეა ადამიანის ფუნდამენტური უფლებების დარღვევების სავარაუდო ფაქტები, მათ შორის, ანრი ატეიბას წამება და არაადამიანური მოპყრობა, სიცოცხლის უფლების ხელყოფა, რაზეც სრული პასუხისმგებლობა ეკისრება აფხაზეთის დე ფაქტო ხელისუფლებას", — აცხადებს DRI.

DRI საერთაშორისო ორგანიზაციებს მოუწოდებს დაინტერესდნენ ანრი ატეიბას საქმის გამოძიების მიმდინარეობით და აფხაზეთში ადამიანის უფლებათა მდგომარეობის მონიტორინგის მიზნით მუშაობა გაააქტიურონ.

არასამთავრობო ორგანიზაცია, ასევე, მიმართავს საქართველოს ხელისუფლებას — ოკუპირებულ ტერიტორიებზე მცხოვრები ყველა ეთნიკური ჯგუფის წარმომადგენლების უფლებების დაცვა/ადვოკატირება ქვეყნის საშინაო და საგარეო პოლიტიკის ერთ-ერთ ყველაზე პრიორიტეტულ მიმართულებად აქციოს.