თბილისში, მთავრობის ადმინისტრაციასთან ოკუპირებულ აფხაზეთში დროშის დაწვისთვის დაპატიმრებული საქართველოს მოქალაქის, ირაკლი ბებუას გათავისუფლება მოითხოვეს. მთავრობის კანცელარიასთან ოჯახის წევრები და სამოქალაქო აქტივისტები შეიკრიბნენ. ოჯახი პრემიერმინისტრ ირაკლი ღარიბაშვილთან შეხვედრას ითხოვს.

"ჩემი ერთადერთი მოთხოვნა ჩემი შვილის გათავისუფლებაა და პრემიერმინისტრთან შეხვედრა. არანაირად არ შედგა ეს ამდენი ხანია სა ვთხოვთ, რომ შეგვხვდეს და მის განთავისუფლებაში რამე გააკეთონ. ერთადერთი ეს მყავს, მეტი არავინ. იშვიათად არის კონტაქტი იქედან. ჯანმრთელობის პრობლემებიც ჰქონდა. ყველაფერთან ერთად, უკვე ნერვოზიც დაერთო", - ამბობს ირაკლი ბებუას დედა, ლალი ფიფია.

ირაკლი ბებუასთვის სოლიდარობის გამოსახატად აქციაზე იმყოფებოდა ექიმი ვაჟა გაფრინდაშვილიც, რომელმაც უკანონო პატიმრობა თავადაც გამოიარა.

ფოტო: ლანა კოკაია / On.ge

ფოტო: ლანა კოკაია / On.ge

30 სექტემბერს საქართველოს მოქალაქე ირაკლი ბებუა გალის რაიონში აფხაზური ე.წ. რესპუბლიკის დროშის დაწვისთვის დააკავეს. ამ ფორმით მან გააპროტესტა "დამოუკიდებლობის" ზეიმი, რომელსაც ოკუპირებულ რეგიონში 30 სექტემბერს აღნიშნავენ.

დროშის დაწვისთვის ირაკლი ბებუას 9 წლით თავისუფლების აღკვეთა 7 დეკემბერს მიუსაჯესა.

გალის რაიონი ერთადერთი მხარეა აფხაზეთში, სადაც მოსახლეობის აბსოლუტურ უმრავლესობას ეთნიკურად ქართველები შეადგენენ. მიუხედავად იმისა, რომ 1992-93 წლებში აფხაზეთში ომის დასრულების შემდეგ, მათ გალის რაიონში, თავიანთ სახლ-კარში დაბრუნების უფლება მისცეს, ადგილობრივი ქართველების უფლებრივი მდგომარეობა ძალიან მძიმეა. იქ არსებული ეთნიკური ნიშნით დისკრიმინაციის გამო, აფხაზურ მხარეს ადამიანის უფლებათა დამცველი სხვადასხვა საერთაშორისო ორგანიზაცია აკრიტიკებს.