ოკუპირებულ აფხაზეთში მცხოვრებმა ეთნიკურად ქართველმა აფხაზეთის ე.წ. რესპუბლიკის დროშა დაწვა. ამ ფორმით მან გააპროტესტა "დამოუკიდებლობის" ზეიმი, რომელსაც ოკუპირებულ რეგიონში 30 სექტემბერს აღნიშნავენ.

ვიდეოში, რომელიც სოციალურ ქსელში გავრცელდა ჩანს, რომ ახალგაზრდა კაცი ე.წ. მილიციელს უკვე დაკავებული ჰყავს და განმარტებებს თხოვს. ის ხსნის, რომ ამ ფორმით პროტესტი გამოხატა არსებული რეალობის მიმართ. ხაზგასმით აღნიშნავს, რომ აფხაზ ხალხს და დროშასაც პატივს სცემს, მაგრამ არ მოსწონს რაც ხდება დღეს მის რეგიონში და სურს, ქართველები და აფხაზები ისევ ერთ სახელმწიფოს ცხოვრობდნენ.

სოციალურ ქსელში გავრცელებისთანავე ვიდეოს აფხაზურ საზოგადოებაში მწვავე რეაქცია მოჰყვა და მუქარის შემცველი კომენტარი გაჩნდა. მის არა მხოლოდ კანონით დასჯას ითხოვენ, არამედ ძალადობრივი მოწოდებებია და სიცოცხლის მოსპობით ემუქრებიან. ამ ეტაპზე უცნობია რა მუხლითაა ის დაკავებული და რა სახის სასჯელი შეიძლება დააკისროს საოკუპაციო რეჟიმმა.

გალის რაიონი ერთადერთი მხარეა აფხაზეთში, სადაც მოსახლეობის აბსოლუტურ უმრავლესობას ეთნიკურად ქართველები შეადგენენ. მიუხედავად იმისა, რომ 1992-93 წლებში აფხაზეთში ომის დასრულების შემდეგ, მათ გალის რაიონში, თავიანთ სახლ-კარში დაბრუნების უფლება მისცეს, ადგილობრივი ქართველების უფლებრივი მდგომარეობა ძალიან მძიმეა. იქ არსებული ეთნიკური ნიშნით დისკრიმინაციის გამო, აფხაზურ მხარეს ადამიანის უფლებათა დამცველი სხვადასხვა საერთაშორისო ორგანიზაციები აკრიტიკებენ.