TV პირველის იურისტი და არხის საინფორმაციო სამსახურის უფროსი, ნოდარ მელაძე ამბობს, რომ ტელევიზიაში პროკურატურა მათი ნებით შევიდა. იურისტის განმარტებით, გუშინ გამოკითხვისას თავად დააფიქსირეს სურვილი, თუ საჭიროდ ჩათვლიდა გამოძიება, ნებაყოფლობით მიეწოდებინათ ნებისმიერი ის ინფორმაცია, რაც 13 სექტემბერს გავრცელებულ ფარული ჩანაწერების საქმეს უკავშირდება.

"შესაბამისად, დღეს ხორციელდება შემოსული შეტყობინებიდან გამომდინარე კომპიუტერის დათვალიერება, საიდანაც გამოძიება დარწმუნდება რომ სწორედ შეტყობინების გამოგზავნით მოხდა ამ ფაილების გაცნობა. მითითებულია კონკრეტული გამომგზავნი, ასევე, საათი და წუთი, თუ როდის მოხდა ამ შეტყობინების მიღება. გარდა ამისა, ჩატარდება მეორე საგამოძიებო მოქმედება. კერძოდ, ჩვენ გადავცემთ გამოძიებას სწორედ იმ ფაილებს, რომლებიც იმ მითითებულ საიტზე იყო განთავსებული", — ამბობს იურისტი.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: