ლელო საქართველოსთვის პარლამენტის საგანგებო სხდომის მოწვევას ითხოვს და ოპოზიციასთან კონსულტაციებს იწყებს. ამის შესახებ პოლიტიკური გაერთიანების საპარლამენტო ფრაქციის თავმჯდომარემ, ბადრი ჯაფარიძემ, საგანგებო ბრიფინგზე განაცხადა.

ჯაფარიძემ ფრაქცია ლელო პარტნიორობა საქართველოსთვის სახელით განცხადება გააკეთა და უკანონო მოსმენები დაგმო. მისი თქმით, ქვეყანაში უკანონოდ უსმენენ, პოლიტიკოსებს, ჟურნალისტებსა და სასულიერო პირებს.

"ორი დღეა, ინფორმაცია ვრცელდება, რომ ინტერნეტ სივრცეში არსებობს 30 ათასამდე ფაილი, რომელიც შეიცავს ჟურნალისტების, პოლიტიკოსების და საეკლესიო პირების თვალთვალის და მიყურადების შედეგად უკანონოდ მოპოვებულ ინფორმაციას", — აცხადებს ჯაფარიძე.

იგი ადასტურებს, რომ გავრცელებულ უკანონო ჩანაწერებში თავისი და ერთ-ერთი სასულიერო პირის კომუნიკაციაა ასახული. ჯაფარიძე სახელმწიფო უსაფრთხოების სამსახურის ხელმძღვანელის, გრიგოლ ლილუაშვილის, პარლამენტის საგანგებო სხდომაზე მოსვლის აუცილებლობას ხედავს.

"ვადასტურებ ინფორმაციას, რომ ჩაწერილია ჩემი და ერთ-ერთი სასულიერო პირის სატელეფონო კომუნიკაცია. ეს ნიშნავს, რომ მიმდინარეობდა მოსმენა, სხვაგვარად ასეთი სიზუსტით ვერ აისახებოდა მოცემულ ფაილებში აღნიშნული დიალოგი. როგორც, ჩანს მოსმენა ხორციელდება რიგი საჯარო და სასულიერო პირების მიმართაც, გადაუდებელი საჭიროებაა იმისა, რომ პარლამენტმა განიხილოს ეს უპრეცედენტო ვითარება.

"აღმოჩნდა, რომ განურჩევლად ყველა ვართ უკანონო მიყურადების და თვალთვალის სუბიექტი. ამიტომ ფრაქცია ლელო პარტნიორობა საქართველოსთვის იწყებს კონსულტაციებს ჩვენს ოპოზიციურ კოლეგებთან, რათა მოწვეულ იქნეს პარლამენტის საგანგებო სხდომა. ამისთვის საჭიროა პარლამენტის სიით შემადგენლობის მეოთხედის მხარდაჭერა. აუცილებელია სახელმწიფო უსაფრთხოების ხელმძღვანელის, ბატონი ლილუაშვილის დასწრება და ამისთვის ჩვენ დავიწყებთ საჭირო რაოდენობის ხმების შეგროვებას. ერთხელ და სამუდამოდ უნდა დავასრულოთ სახელმწიფოს დანგრევისკენ მიმართული პრაქტიკა, რაც გულისხმობს უკანონო მიყურადებას, პირად ცხოვრებაში ჩარევას. ყველა იმ ადამიანმა, რომელიც დგას ამ საქმიანობის უკან, პასუხი უნდა აგოს კანონის წინაშე, სრული სიმკაცრით", — დასძენს ჯაფარიძე.