თბილისის მერი კახა კალაძე არ გამორიცხავს, რომ ფარული ჩანაწერები შესაძლოა ქართული ოცნების ყოფილი წევრის და ამჟამად პარტია საქართველოსთვის თავმჯდომარის მოადგილის, ალექსანდრე ხოჯევანიშვილის გავრცელებული იყოს.

"არ ვიცი ვინ არის, შეიძლება იყოს ხოჯევანიშვილი, შეიძლება სხვა ვინმე. დაველოდოთ გამოძიებას. ვინც არ უნდა იყოს, ამ ქმედებას მოყვება შესაბამისი მკაცრი რეაგირება", — განაცხადა კალაძემ.

ჩანაწერების გავრცელებასთან დაკავშირებით გახარიასა და მისი გუნდის მისამართით კითხვებს ქართული ოცნებადან თეა წულუკიანი და ირაკლი ღარიბაშვილიც სვამს.

გამოთქმულ კრიტიკასა და ბრალდებას პალიტრანიუსში გახარიას გუნდის ერთ-ერთი წევრი კახაბერ ქემოკლიძე გამოეხმაურა. ქემოკლიძის თქმით, "პირი გამოირეცხონ, როდესაც მათ გვარებს ახსენებენ". მისი შეფასებით, ეს გადაბრალების მცდელობაა.

გაიგე მეტი:

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: