კულტურის მინისტრი თეა წულუკიანი გავრცელებულ ფარულ ჩანაწერებთან დაკავშირებით კითხვებს ყოფილი პრემიერმინისტრის, გიორგი გახარიასა და მისი გუნდის მისამართითაც სვამს. მან ალექსანდრე ხოჯევანიშვილს "მეტრუპე" უწოდა, გახარიას კი — ავანტიურისტი.

"როდესაც ხარ ხელისუფლებაში მრავალი თვე და მრავალი წელი, მსახურობ სახელმწიფო უსაფრთხოების სამსახურში, როდესაც შენი თანაგუნდელი სუს-ის უფროსის მოადგილე და კურირებს ფარულ ოპერატიულ საქმიანობას, მათ შორის მიყურადებებს. ვგულისხმობ ბატონ ხოჯევანიშვილს. როდესაც თქვენი ყველას ხელმძღვანელია ბატონი გახარია და ჩემიც მათ შორის იმ დროს და მე რომ ჩუმად ვარ ეს იმას არ ნიშნავს, რომ ამნეზია მჭირს", — თქვა წულუკიანმა იმედის ეთერში.

მისივე თქმით, მან არაფერი იცის, უბრალოდ სვამს კითხვებს, რომლებიც ლეგიტიმური ჰგონია.

"როდესაც შენ სუს-ში მსახურობდი, როდესაც შენი თანაგუნდელი და ამ გუნდის ერთ-ერთი წამყვანი ფიგურა, ვგულისხმობ, ხოჯევანიშვილს, დავგუგლოთ, გუგლი ახლა მოდაშია და ვანო მერაბიშვილს უდგას გვერდით, რომელიც ავალებს ორი ტრუპი მომიყვანეო. ეს მეტრუპეები, რომლებიც იყვნენ ხელისუფლებაში. ჩვენი გუნდის წევრები რომ იყვნენ, მე ეს არ მიკრძალავს დავსვა კონკრეტული კითხვები", — დასძენს ყოფილი იუსტიციის მინისტრი.

მან, ასევე, თქვა, რომ თებერვლის შემდეგ გახარია ავანტიურით არის დაკავებული.

"არის კითხვები, როდესაც გახარია შინაგან საქმეთა მინისტრი იყო, მაშინ სად იყო ხოჯევანიშვილი. ვინ იყო გახარია. გახარია რომ ვიცე-პრემიერი, ჩვენი ყველას და ძალოვანი სტრუქტურების კურატორი იყო. დღეს ეს ხალხი, რომ რაღაცას კეკლუცობს".

წულუკიანი, აგრეთვე, ამბობს, რომ ის გახარიას მინიმუმ ერთხელ შესასრულებლად გაუგონარი დავალების მისაცემად ჰყავს დაბარებული, რომლის შესრულებაზეც, როგორც წულუკიანი ამბობს უარი უთქვამს. წულუკიანს არ დაუკონკრეტებია, რა დავალებები ჰქონდა მასთან ყოფილ პრემიერმინისტრს.

პარტიას საქართველოსთვის წევრების მისამართით გამოთქმულ კრიტიკასა და ბრალდებას პალიტრანიუსში გახარიას გუნდის ერთ-ერთი წევრი კახაბერ ქემოკლიძე გამოეხმაურა. ქემოკლიძის თქმით, "პირი გამოირეცხონ, როდესაც მათ გვარებს ახსენებენ". მისი შეფასებით, ეს გადაბრალების მცდელობაა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: