პარტიის, გირჩი — მეტი თავისუფლება ლიდერი, ზურაბ ჯაფარიძე ტრაგიკულს უწოდებს თბილისის მერობის კანდიდატის, გიორგი გახარიას გადაწყვეტილებას, ნარკოტესტის უცხოეთში ჩატარებაზე. ჯაფარიძე ფიქრობს, რომ გახარიას შეეძლო საერთოდ უარი ეთქვა ამ ტესტის გაკეთებაზე.

"ჩემი აზრით, უნდობლობაზე უფრო მეტად, ტრაგიკული ამბავი არის, რომ სერიოზული ამბიციების და პრეტენზიების მქონე პოლიტიკოსი მოსაფსმელად მიდის სადღაც, სხვა ქვეყანაში. თავმოყვარეობის ამბავია. რატომ უნდა აკეთებდეს ამას პოლიტიკოსი, მე არ მესმის. ხომ შეეძლო უბრალოდ ეთქვა, რომ ფეხზე მკიდია ყველაფერი და კარგად იყავით. როგორ შეიძლება არჩევნების წინ სერიოზულად განიხილებოდეს, რომ მე წავალ ახლა გერმანიაში ან სადღაც, არ ვიცი, მოვფსამ, იქ შევამოწმებ, მერე ჩამოვალ და დაგიდასტურებთ, რომ არა ვარ ნარკოტიკების მომხმარებელი. სასაცილოა, რა უბედურებაა?!" — განაცხადა ზურაბ ჯაფარიძემ.

ჟურნალისტის შენიშვნას, რომ გახარიამ ეს გადაწყვეტილება შესაძლო პროვოკაციის თავიდან აცილების მიზნით მიიღო, ჯაფარიძემ ასე უპასუხა:

"რაც გინდა ის იყოს, რა მნიშვნელობა აქვს. როგორ შეიძლება ძალით გაფსმევინებდნენ? თქვი, რომ ფეხებზე მკიდია და მორჩა. ვისი რა საქმეა? გერმანიაში წავალ მოვფსამ უკეთესი პასუხია?"

თბილისის მერობის კანდიდატმა, გიორგი გახარიამ დღეს განაცხადა, რომ სამხარაულის ექსპერტიზის ბიუროდან მიაწოდეს ინფორმაცია შესაძლო პროვოკაციასთან დაკავშირებით. კონკრეტულად, მისი თქმით, პროვოკაცია მზადდებოდა ქართული ოცნების მხრიდან და ეს უკავშირდებოდა მის ტესტირებას ნარკოტიკზე.

ნარკოტესტი პირველად ქართული ოცნების მერობის კანდიდატმა, კახა კალაძემ ჩაიტარა, ეს ჯანსაღი ცხოვრების პოპულარიზაციით ახსნა და სხვა კანდიდატებსაც იგივე მოუწოდა. მოწოდების საპასუხოდ, გახარიამ განაცხადა, რომ ოპონენტებმა მასთან დებატებზე პირისპირ დაჯდომის შიშით "ბანკებით" სირბილი დაიწყეს. 10 სექტემბერს მან, ასევე, განაცხადა, რომ ახლო მომავალში ნარკოტესტთან დაკავშირებით "საინტერესო ინფორმაციას" გაამხელდა.

გაიგე მეტი: