სავარაუდოდ, სუს-ის ფაილების გავრცელებაზე საუბრისას ქართული ოცნების ლიდერმა, გია ვოლსკიმ ისევ ნაციონალურ მოძრაობაზე მიუთითა. მან ხაზი გაუსვა, რომ მსგავს მეთოდებს ყოფილი ხელისუფლება იყენებდა, თუმცა გამოქვეყნებულ დოკუმენტებში ქართული ოცნების მმართველობის პერიოდის ჩანაწერებია.

"თუ ვინმე ფაილებს აგროვებდა, თუ ვინმე ჩანაწერებს აკეთებდა, მათ შორის, პირადი ცხოვრების, მონაზვნების, მღვდლების, თითოეული ჩვენგანის, ჟურნალისტების, მათ შორის, თქვენი, ეს იყო ნაც. მოძრაობა. ეს ფაილები არსებობს, არსად არ გამქრალა", — განაცხადა ვოლსკიმ.

ვოსლკი ოპოზიციური მედიის წარმომადგენლებს მიმართავს და აცხადებს, რომ გავრცელებული ფაილები არაფერს ნიშნავს და ისინი შეიძლება კონკრეტული ტელევიზიისთვის იყოს მტკიცებულება, მაგრამ "კომპეტენტური საზოგადოებისთვის" არა.

"გამოვიდა ერთი ყოფილი თანამშრომელი და თქვა, რომ ყველას უსმენენ და რაღაც ფურცლები ააფრიალა. ეს არაფერს არ ნიშნავს, რასაკვირველია, მაგრამ შესწავლა საკითხის და ამაზე მკაფიო კომენტარების გაკეთება საზოგადოებისთვის საყურადღებოდ არის აუცილებელი. ეს მტკიცებულება შეიძლება იყოს თქვენი ტელევიზიისთვის, მაგრამ შეიძლება მტკიცებულება არ იყოს კომპეტენტური საზოგადოებისთვის", — ამბობს ვოლსკი.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.

ამავე თემაზე: