თბილისის საქალაქო სასამართლოს მოსამართლე ლელა ცაგარეიშვილმა გიგა მაქარაშვილი, პოლიციის მოთხოვნისადმი დაუმორჩილებლობის გამო, ადმინისტრაციულ სამართალდამრღვევად ცნო და 2 000 ლარიანი ჯარიმის გადახდა დააკისრა. საქართველოს დემოკრატიული ინიციატივის (GDI) შეფასებით, საერთო სასამართლოები მშვიდობიანი სამოქალაქო აქტივისტების დევნას, გასამართლებასა და უმკაცრესი სანქციებით დასჯას აგრძელებენ.

მიმდინარე წლის 3 ივნისს, საქართველოს გენერალურ პროკურატურასთან იმართებოდა აქცია, სადაც სამოქალაქო აქტივისტები და პოლიტიკოსები ნინოწმინდის ბავშვთა სახლის გარშემო განვითარებულ მოვლენებს აპროტესტებდნენ. GDI აცხადებს, რომ გიგა მაქარაშვილი შეკრების კონსტიტუციური უფლებით სარგებლობდა, რა დროსაც, ყოველგვარი გაფრთხილების გარეშე, პოლიციის თანამშრომლებმა ხელები გადაუტრიალეს და დააკავეს.

"დაკავების დროს მოტეხეს ხელი, ხელში კი ურტყამდნენ ხელბორკილს, რითიც ფიზიკური დაზიანებები მიაყენეს. მიუხედავად ადვოკატის მოთხოვნისა, გენერალური პროკურატურა სისხლის სამართლის საპროცესო კოდექსის დარღვევით, გიგა მაქარაშვილს დაზარალებულის სტატუსს არ ანიჭებს და არ აძლევს საქმის მასალების გაცნობის უფლებას.

გიგა მაქარაშვილს, არც დაკავებამდე და არც დაკავების შემდეგ, პოლიციელებისთვის წინააღმდეგობა არ გაუწევია და აღნიშნული დადასტურდა თავად შსს-ს წარმომადგენლების მიერ სასამართლო პროცესზე წარმოდგენილი ვიდეო მასალითაც. სხვადასხვა ტელეკომპანიის ოპერატორის მიერ გადაღებული ვიდეოებიდან ირკვევა, რომ გიგა მაქარაშვილი მშვიდობიანად დგას და პოლიციის თანამშრომლები ყოველგვარი გაფრთხილების ან მოწოდების გარეშე აკავებენ მას", — ნათქვამია GDI-ს განცხადებაში.

აღნიშნულ ფაქტებთან დაკავშირებით სახელმწიფო ინსპექტორის სამსახურში მიმდინარეობს გამოძიება პოლიციელების მხრიდან სამსახურებრივი უფლებამოსილების ძალადობით გადამეტების ფაქტზე, სისხლის სამართლის კოდექსის 333-ე მუხლის მე-3 ნაწილის "ბ" პუნქტით.

არასამთავრობო ორგანიზაცია აცხადებს, რომ მოსამართლე მხოლოდ ერთი პოლიციელის ჩვენებას დაეყრდნო, რომელიც გიგა მაქარაშვილის დაკავების პროცესში მონაწილეობდა და იყო დაინტერესებული პირი. GDI-ს თანახმად, ამასთან, მისი ჩვენება თავად შსს-ს წარმომადგნელების მიერ პროცესზე წარმოდგენილ ვიდეო მტკიცებულებებს ეწინააღმდეგებოდა.

ორგანიზაცია, ასევე, დასძინა, რომ GDI გიგა მაქარაშვილის უფლებების დაცვას აგრძელებს და სასამართლოს გადაწყვეტილებას თბილისის სააპელაციო სასამართლოში გაასაჩივრებს. მათივე ცნობით, საქმის წარმოება ღია საზოგადოების ფონდის ფინანსური მხარდაჭერით, პროექტის — იურიდიული დახმარების ქსელი აქტივისტებისათვის ფარგლებში მიმდინარეობს.