მოძრაობა სირცხვილიას ინფორმაციით, გიგა მაქარაშვილს დაკავებისას პოლიციამ ხელი მოტეხა. აქტივისტები აცხადებენ, რომ მაქარაშვილი საავადმყოფოშია გადაყვანილი და თაბაშირში ჩასმული ხელის ფოტოს ავრცელებენ.

On.ge-ს შინაგან საქმეთა სამინისტროში არ პასუხობენ კითხვაზე, დაშავდა თუ არა აქტივისტი დაკავებისას და სად იმყოფება ის ამჟამად. მიმდინარე მოვლენებზე უწყებაში მხოლოდ იმას ამბობენ, რომ ადმინისტრაციული სამართალდარღვევით 6 პირია დაკავებული.

პროკურატურასთან, სადაც ნინოწმინდის პანსიონში არსებულ მდგომარეობას აპროტესტებენ, პოლიცია აქტივისტებს აკავებს ისე, რომ მიზეზს არ განმარტავს. კონკრეტულად რა მუხლით არიან დაკავებული ისინი, ამ ეტაპზე უცნობია.

უწყებასთან სიტუაცია მას შემდეგ დაიძაბა, როცა ელენე ხოშტარიამ შენობაში შესვლა და ნინოწმინდის პანსიონის საკითხზე პროკურორებთან საუბარი მოითხოვა. მას ამის საშუალება არ მისცეს. დაცვამ კარის ჩაკეტვა სცადა, რასაც დაპირისპირება მოყვა, ამ დროს ადგილზე მყოფმა პოლიციამ მაქარაშვილი დააკავა და ფოიეში შესასვლელი ჩაკეტა.

დანარჩენი აქტივისტები კი მაშინ დააკავეს, როცა ელენე ხოშტარიამ პულივიზატორით "ნინოწმინდის" დაწერა სცადა. პოლიტიკოსს ამის საშუალება არ მისცეს, აქტივისტები კი პოლიციის მანქანაში ძალით ჩასვეს.

"დავიხსნათ ბავშვები ტყვეობიდან" — პროკურატურასთან აქცია ამ სლოგანით იმართება. მოქალაქეები და სამოქალაქო აქტივისტები მოითხოვენ, სახელმწიფომ დახუროს ნინოწმინდის პანსიონის ტიპის ბავშვთა სახლები და დაიხსნან ბავშვები ძალადობრივი გარემოდან, სასწრაფოდ გამოიძიოს პანსიონთან დაკავშირებული დანაშაულებები და შეუშვას სახალხო დამცველის წარმომადგენლები დაწესებულებაში.