საერთაშორისო გამჭვირვალობა — საქართველომ სახელმწიფო ბიუჯეტის 6 თვის შესრულების ანგარიშის ანალიზი გამოაქვეყნა, რომლის ერთი ნაწილი მთავრობის მხრიდან კორონავირუსთან გასამკლავებელი ღონისძიებების დაფინანსების საკითხს ეთმობა.

კვლევაში ნათქვამია, რომ პანდემიამ სახელმწიფო ბიუჯეტში ახალი ხარჯვითი პროგრამების შექმნა განაპირობა:

  • ჯანდაცვა;
  • სოციალური დახმარება;
  • ბიზნესის სუბსიდირება.

როგორც TI-ის ანგარიშში ვკითხულობთ, ამ პროგრამების დასაფინანსებლად მიმდინარე წლის 6 თვეში სულ 921 მილიონი ლარი იყო გამოყოფილი, საიდანაც 822 მილიონი დაიხარჯა (89%).

"ჯანდაცვის მიმართულებით იანვარ-ივნისში 511,1 მილიონი ლარი იყო გამოყოფილი, საიდანაც 425 მლნ ლარი დაიხარჯა, მათ შორის 96 მილიონი ლარი ვაქცინის შეძენას მოხმარდა. 11 მილიონი ლარი კარანტინზე და სხვა ღონისძიებებზე დაიხარჯა.

სოციალურ დახმარებებზე 350 მილიონ ლარამდე დაიხარჯა. ყველაზე მეტი თანხა კი — 142 მილიონი ლარი დროებით უმუშევრად დარჩენილების კომპენსაციაზე იქნა გაცემული. 105 მილიონი ლარი დაიხარჯა კომუნალური გადასახადების სუბსიდირებაზე.

ბიზნესის სუბსიდირების მიმართულებით სულ 36 მილიონი ლარი დაიხარჯა და გეგმა 96%-ით შესრულდა", — ნათქვამია TI-ის კვლევაში.

TI-ის ანგარიშში მითითებულია, რომ პანდემიის გამო წლის ბოლომდე ჯამში 1,4 მილიარდ ლარამდე დაიხარჯება: ჯანდაცვის მიმართულებით 831 მილიონი ლარი, სოციალური მიმართულებით — 415 მილიონი ლარი და ბიზნესის სუბსიდირების მიმართულებით — 112 მილიონი ლარი.