ჯანდაცვის მინისტრის მოადგილის, თამარ გაბუნიას განცხადებით, კორონავირუსის ახალი ტალღის შემთხვევაში დარტყმის მთავარი სამიზნე არავაქცინირებული ადამიანი იქნება. მისი თქმით, მეხუთე ტალღის რისკის შემთხვევაში, მნიშვნელოვანი იქნება მისი გავრცელების სიჩქარის შეჩერება.

"ვაქცინაცია, სწრაფი არის ძალიან მნიშვნელოვანი, რადგან ამ პირობებში, არავაქცინირებული ადამიანი გახდება ძალიან ძლიერი დარტყმის პირველი სამიზნე. ამდენად, მნიშვნელოვანია ის, რომ ძალიან მცირე დარჩეს საზოგადოებაში არავაქცინირებული ჯგუფი [...]

პირველი, რაც ჩვენ უნდა გავაკეთოთ, არის ის, რომ მაქსიმალურად ვეცადოთ თავიდან ავიცილოთ ახალი ტალღის გავრცელება ისეთ სისწრაფით, როგორც გასული, მეოთხე ტალღის პერიოდში გვქონდა", — ამბობს გაბუნია.

მისი თქმით, ვირუსის გავრცელების შეჩერებისთვის ვაქცინაციის გარდა მნიშვნელოვანია რეგულაციების დაცვა.

"ის რეგულაციები, რომლებიც დაწესებულია, განსაკუთრებით პირბადე და სოციალური დისტანცირება, კიდევ დიდხანს დაგვჭირდება", — განაცხადა თამარ გაბუნიამ.

რამდენადაა მოსალოდნელი კორონავირუსის მეხუთე ტალღა შემოდგომაზე? ამ კითხვას ჯანდაცვის მინისტრის მოადგილე ასე პასუხობს:

"ახალი ტალღების მოლოდინი, რა თქმა უნდა, არა მხოლოდ ჩვენ, გლობალურად, ყველა ქვეყანას აქვს. ეს შეიძლება უკავშირდებოდეს განსხვავებული შტამების აღმოჩენას, ასევე, არასაკმარისად იმუნური ფენის ჩამოყალიბებას ქვეყანაში და რეგულაციების უგულებელყოფას. ეს არის ის მიზეზები, რამაც, შესაძლოა, ახალი ტალღა გამოიწვიოს".

გაიგე მეტი: