ლელოს მერობის კანდიდატმა, ანა ბიბილაშვილმა, საკრებულოს თავმჯდომარეობის კანდიდატმა, ბადრი ჯაფარიძემ და დიდუბის რაიონის მაჟორიტარობის კანდიდატმა, დიმიტრი აბაშიძემ წერეთლის გამზირზე მსვლელობა გამართეს. ისინი შეხვდნენ ხალხს, ისაუბრეს ლელოს ხედვებზე, თუ როგორ უნდა განვითარდეს დიდუბის რაიონი, ისე რომ ცვლილებები იყოს ხალხის სასიკეთოდ და არ დაზარალდნენ ისინი.

ლელოს საკრებულოს თავმჯდომარეობის კანდიდატის, ბადრი ჯაფარიძის თქმით, დიდუბე არის უზარმაზარი პოტენციალის მატარებელი, რომელიც თბილისის მიზიდულობის ცენტრად უნდა გადაიქცეს.

"დიდუბე არის რაიონი რომელიც დღეს საჭიროებს დახმარებას, რადგან მისი პოტენციალი თავიდან ბოლომდე ავითვისოთ. მაგალითად, აქ არის ოკრიბის ტერიტორია, სადაც დღეს არის ქაოსი, შესაძლებელია გადავაქციოთ საჩვენებელ ადგილად. ეს ცვლილება, რა თქმა უნდა, უარყოფითად არ აისახება ადამიანების ეკონომიკურ მდგომარეობაზე. ასევე, გადასარჩენია დიღმის ტყე-პარკი, რომელიც სხვადასხვა დროს იყო კომერციული ინტერესების სამიზნე, ჩვენ უნდა დავასრულოთ ამ ადგილისთვის ბრძოლა ჩვენი თანამოქალაქეების სასარგებლოდ", — აღნიშნა ბადრი ჯაფარიძემ.

"ყველა სივრცეს უნდა ჰქონდეს თავის ფუნქცია და მისი ისტორია იყოს წამოწეული", — ამის შესახებ წერეთლის გამზირზე მსვლელობის დროს ლელოს მერობის კანდიდატმა ანა ბიბილაშვილმა ისაუბრა.

"მუშტაიდის ბაღი, სადაც პირველი საბავშვო რკინიგზა იყო და დღეს არავის არ ახსოვს, ჩვენ უნდა განვავითაროთ. არ უნდა დავკარგოთ ის ისტორია რომელმაც ქალაქი და უბანი შექმნეს. აუცილებლად უნდა მივხედოთ ელიავას ბაზრობას, ოკრიბას და დიღმის ტყე-პარკს. ეს ყველაფერი კი ისე უნდა გადაწყდეს, რომ ჩვენი თანამოქალაქეები არ დაზარალდნენ. პირიქით, რაც ამ ქალაქში კეთდება, კეთდება მათ სასარგებლოდ", — განაცხადა ბიბილაშვილმა.

ლელოს დიდუბის მაჟორიტარობის კანდიდატმა დიმიტრი აბაშიძემ. რაიონის სტრატეგიულ განვითარებაზე ისაუბრა.

"დიდუბე არის სტრატეგიული ადგილი და ჩვენ უნდა მივხედოთ მას. აუცილებლად მიმაჩნია წერეთლის გამზირი მოეწყოს ისე რომ ყველა ადამიანისთვის იყოს მისაღები. სამწუხაროდ, წერეთლის გამზირზე რთულია შშმ პირების გადაადგილება და ამ საკითხს აუცილებლად უნდა მივხედოთ. რაიონში, პრობლემებთან ერთად არის წყალგაყვანილობის პრობლემაც, რომელიც უნდა გამოვასწოროთ. ბოლომდე უნდა დავიხარჯოთ ამ ქალაქისთვის და ჩვენი ქვეყნის უკეთესი ხვალინდელი დღისთვის", — აღნიშნა დიმიტრი აბაშიძემ.