27 აგვისტოს გორის საკრებულოს დამოუკიდებელ დეპუტატს, ირმა ამბარდნიშვილს თავს დაესხნენ. ამბარდნიშვილის განცხადებით, თავდამსხმელებმა სიტყვიერი და ფიზიკური შეურაცხყოფა მიაყენეს, აგინეს, ესროლეს სხვადასხვა ნივთი, მინის ნატეხი და იარაღით სიცოცხლის მოსპობით დაემუქრნენ, რის შემდეგაც მან საპატრულო პოლიციის ეკიპაჟი გამოიძახა.

On.ge-სთან საუბრისას დეპუტატი ამბობს, რომ ადგილზე მისულ საპატრულო პოლიციის თანამშრომლებს შესაბამისი ზომები არ მიუღიათ.

"ერთ-ერთმა თავდამსხმელმა, რომელსაც 16 წელი აქვს სასჯელი მოხდილი, დაასახელა შსს-ს მაღალჩინოსნები და მათ შორის ოლიმპიური ჩემპიონი, ლაშა ბექაური, რომელიც მათი ნათესავია და პოლიცია დაიბნა, უმოქმედოდ ერთი საათი აგინებინა, რომ მე ვარ საკრებულოს წევრი ნაციონალური მოძრაობიდან", — განაცხადა მან.

ამბარდნიშვილის თქმით, პოლიციის თანამშრომლებს სთხოვა, ამოეღოთ სათვალთვალო კამერების ჩანაწერები მიმდებარე მაღაზიიდან და ჩაეტარებინათ ჩხრეკა იმ თავდამსხმელის სახლში, რომელმაც მას იარაღი დაუმიზნა, თუმცა მისი თქმით, აღნიშნული სამუშაოები ადგილზე არ ჩაუტარებიათ.

ამბარდნიშვილი მიიჩნევს, რომ მოქმედ დეპუტატზე თავდასხმა და მსგავსი ფაქტები არჩევნების სამართლიან გარემოში ჩატარებას კითხვის ნიშნის ქვეშ აყენებს.

"არჩევნები როგორ უნდა ჩატარდეს, მე რომ მაგას მიბედავენ, თქვენ წარმოიდგინეთ, ჩვეულებრივ მოქალაქეებს რას უზამენ", — ამბობს დეპუტატი.

On.ge-ს შსს-ში განუცხადეს, რომ ფაქტზე გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.