საქართველოს ექსპრეზიდენტის, მიხეილ სააკაშვილის განცხადებით, მისი ჩარევა არ არის საჭირო იმისთვის, რომ ქართული ოცნების ხელისუფლების პირობებში საქართველოს მაკროსაფინანსო დახმარება შეუწყვიტონ. მისი აზრით, ამისთვის ღარიბაშვილის დანახვაც საკმარისია, რადგან ყველას უყალიბდება თავისი აზრი.

სააკაშვილი ამბობს იმასაც, რომ ევროკავშირის დახმარებაზე უარის თქმა გამოიწვევს ლარის კიდევ უფრო გაუფასურებას და უმუშევრობის გაზრდას.

"რაში სჭირდება ჩემი მცდელობა იმას, რომ ამათ შეუჩერონ დახმარება, ღარიბაშვილის დანახვა საკმარისზე მეტია იმისათვის, რომ ყველას ჩამოუყალიბდეს თავისი აზრი. მე ბერვს დავდივარ და ვხვდები ევროკომისიის წარმომადგენლებს, ევროპარლამენტარებს დიდი რაოდენობით, ბოლო ერთ-ერთი ვიზიტის დროს ბრიუსელში კომისიის ერთ-ერთმა მაღალჩინოსანმა მითხრა ღარიბაშვილზე, რომ ეს არის კლინიკური იდიოტიო, ვციტირებ.

მე ამათგან განსხვავებით სკოლაში კარგად ვსწავლობდი და ეს იგავი მახსოვს, როცა მელაკუდა ვერ მიწვდა ყურძენს, დარჩა ამოძუებული, მაგრამ მაინც არ გაიტეხა კუდიანმა ვითომ გული და ურცხვად ეს დაიკვეხნა — რომ არ ვჭამე კარგი ვქენი გეფიცებით შვილებსაო, მჟავე იყო ის ყურძენი და მომტეხდა კბილებსაო. ეს არის ზუსტად ივანიშვილის და მისი მთავრობის დამოკიდებულება ევროკავშირთან, ვინ აძლევდა ყურძენს, ვერ წვდებოდნენ, ვეღარ მიწვდნენ და ვეღარც მიწვდებიან, ეს ოროსნები მართლა", — აცხადებს სააკაშვილი.

ექსპრეზიდენტის თქმით, ქართულმა ოცნებამ დახმარება არ უნდა მიიღოს, რადგან ეს ფული ქართველ ხალხამდე არ აღწევს. სააკაშვილი ამბობს, რომ მმართველი პარტია ცდილობს საქართველო საბოლოოდ ჩამოაშოროს ევროპას და რუსულ ჭაობად აქციოს.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროფინანსური დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს". დახმარების არგამოყოფის შემთხვევაში პოლიტიკურ დატვირთვასთან დაკავშირებით კი კობახიძე აცხადებს, რომ ქართულ ოცნებას ეს გაცნობიერებული აქვს და ყველაფერი ევროკავშირის გადასაწყვეტია, "მაგრამ ქართული ოცნება თავიდან ბოლომდე მოქმედებს ქვეყნის და ჩვენი სტრატეგიული პარტნიორების ობიექტური ინტერესების შესაბამისად".

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".