ადგილების ჩამონათვალი, სადაც საქართველოს პარტნიორი ქვეყნების სახელმწიფო სიმბოლოების შეურაცხყოფა დასჯადი ხდება, ფართოვდება და ოფიციალური ღონისძიებები დაემატება. გარდა ამისა, კანონპროექტის სასესიო განხილვამდე ამ ჩამონათვლის უფრო მეტად დაკონკრეტებაზე იმუშავებენ. ამის შესახებ ცნობილი დღეს პარლამენტის ევროინტეგრაციის კომიტეტის სხდომაზე გახდა, სადაც პროექტი პირველი მოსმენით განიხილეს.

როგორც პროექტის ერთ-ერთმა ავტორმა, ნიკოლოზ სამხარაძემ, განმარტა ჩამონათვალში ოფიციალური ღონისძიებების დამატების საკითხი პრაქტიკული საჭიროებიდან გამომდინარე გახდა, რადგან შესაძლოა, ვინმემ სწორედ ასეთ ღონისძიებაზე მოინდომოს სიმბოლოების შეურაცხყოფა.

ასევე დააზუსტებენ ჩამონათვალს, თუ რა ტერიტორია ჩაითვლება კატეგორიაში — ადმინისტრაციული შენობის წინ.

კანონპროექტის თანახმად, ადმინისტრაციული პასუხისმგებლობა წესდება ევროკავშირის, ჩრდილოატლანტიკური ხელშეკრულების ორგანიზაციის ოფიციალური სიმბოლოს, ასევე იმ სხვა საერთაშორისო ორგანიზაციის ოფიციალური სიმბოლოს შებღალვისთვის, რომლის წევრიც საქართველოა. ასევე, პირს ადმინისტრაციული პასუხისმგებლობა იმ სახელმწიფოს ეროვნული სიმბოლოს შებღალვისთვის დაეკისრება, რომელთანაც საქართველოს დიპლომატიური ურთიერთობა აქვს და რომელიც აღმართულია ან გამოფენილია საჯარო დაწესებულებებზე, საჯარო დაწესებულების წინ ან საჯარო დაწესებულების შენობაში.

შესაბამისად, ადმინისტრაციულ სამართალდარღვევათა კოდექსის 174-ე მუხლს, რომელიც თვითნებობას გულისხმობს, ახალი 18 პრიმა პუნქტი დაემატება, რომლის თანახმად, აღნიშნული ქმედება გამოიწვევს ფიზიკური პირის 1 000 ლარით დაჯარიმებას. იგივე ქმედების განმეორებით ჩადენა გამოიწვევს ფიზიკური პირის დაჯარიმებას 2 000 ლარით ან ფიზიკური პირის ადმინისტრაციულ პატიმრობას, 15 დღემდე ვადით.

კანონპროექტი მას შემდეგ მომზადდა, რაც 5-6 ივლისს ძალადობრივი კონტრაქციის მონაწილეებმა პარლამენტის წინ აღმართული ევროკავშირის დროშა ორჯერ ჩამოხსნეს და დახიეს. მიუხედავად იმისა, რომ მაშინ ამ ფაქტს საზოგადოების დიდი ნაწილის აღშფოთება მოჰყვა, ხელისუფლებამ შესაბამისი რეაგირების არარსებობა საკანონმდებლო ხარვეზით ახსნა — ქართულ კანონმდებლობაში არ არსებობს ჩანაწერი, როგორ უნდა დაისაჯოს უცხო ქვეყნის დროშის და სახელმწიფო სიმბოლოების შეურაცხყოფა. მოქმედი კანონმდებლობით, სახელმწიფო გერბის ან დროშის შებღალვა ისჯება სისხლის სამართლის კოდექსით (მუხლი 343). ამ დანაშაულისთვის განსაზღვრულია ან შინაპატიმრობა ვადით ექვსი თვიდან ორ წლამდე, ან თავისუფლების აღკვეთით ორ წლამდე ვადით.

პარლამენტი პროექტის სასესიო განხილვას საშემოდგომო სესიაზე დაიწყებს. დამტკიცების შემდეგ კანონი 15 დღეში უნდა ამოქმედდეს და მას უკუძალა არ ექნება, რაც იმას ნიშნავს, რომ ძალადობრივი კონტრაქციის მონაწილეები, რომლებმაც ევროკავშირის დროშა ორჯერ ჩამოხიეს, ამისთვის ვერ დაისჯებიან.